கிராமசபை கூட்டத்தில் மதுக்கடைகடைகளை மூட தீர்மானம் நிறைவேற்ற மக்கள் சக்தி இயக்கம் வலியுறுத்தல்

மதுவிலக்கை அமல்படுத்த கிராமசபைகளுக்கு அதிகாரம் உண்டு என்பதால் சுதந்திர தினத்தன்று நடைபெறவுள்ள கிராமசபை கூட்டங்களில் டாஸ்மாக் மதுபானக்கடைகளை அரசு மூட வேண்டும் என தீர்மானம் நிறைவேற்றி அரசுக்கு அனுப்பி வைக்க வேண்டும் என ஊராட்சி தலைவர்களுக்கு மக்கள் சக்தி இயக்கம் வேண்டுகோள் விடுத்துள்ளது.

இதுகுறித்து மக்கள் சக்தி இயக்கத் தலைவர் பேராசிரியர் முனைவர் ஏ.சண்முகம் வெளியிட்டுள்ள அறிக்கை: தமிழகத்தில் நடைபெறுகின்ற 15 சதவீத கொலைகளுக்கும், குடிப்பழக்கமே காரணமம் என புள்ளவிபரம் தெரிவிக்கிறது. 10 முதல் 20 சதவீதம் பேர் குடியினால் பாதிக்கப்பட்டுள்ளனர். 30 முதல் 35 சதவீதம் வரை தற்கொலைகளுக்கும், 50 சதவீதத்திற்கு மேல் சாலை விபத்துகளுக்கும் குடிப்பழக்கமே காரணாகிறது. இப்படி தனிமனிதன், அவர் குடும்பம் மற்றும் சமுதாயத்தையும் அழிக்கின்ற குடியை ஒழிக்க காந்தியடிகள் மதுவிலக்கு கொள்கையை எடுத்துக் கொண்டு போராடினார். தன்னுடைய 18 அம்சங்கள் அடங்கிய தீர்மான திட்டத்தில் மூன்றாவது அம்சமாக மதுவிலக்கை வைத்திருந்தார். அரசு வழிகாட்டுக் கொள்கையில் 47-வது பிரிவில் மதுவிலக்க கொள்கையை அமல்படுத்துவது அரசின் கடமையாகும்.

மதுவிலக்கை அமல்படுத்த கிராம பஞ்சாயத்துக்கு அதிகாரம் உண்டு: இந்திய ஜனநாயக அமைப்பில் கிராம பஞ்சாயத்திற்கும், கிராமசபையும் அடித்தளமாக அமைந்திருக்கிறது. பஞ்சாயத்து சட்டத்தில் இவைகளுக்கு தக்க அதிகாரங்களும் கொடுக்கப்பட்டுள்ளன. ஆகையால் மக்களால் தேர்தெடுக்கப்பட்ட பஞ்சாயத்து தலைவர்களுக்கு தங்கள் கிராமங்களில் வாழ்கின்ற ஏழை மக்களை காப்பாற்ற வேண்டிய பொறுப்பு உள்ளது. சமுதாயத்தை மாற்றி அமைக்கும் அதிகாரமும், சக்தியும் கிராமசபையிடமே கொடுக்கப்பட்டுள்ளது. எனவே வரும் ஆகஸ்ட் 15-ம் தேதி நடக்க இருக்கும் கிராமசபை கூட்டத்தில் தங்கள் பஞ்சாயத்து பகுதிகளில் உள்ள டாஸ்மாக் கடைகளை அரசு மூட வேண்டுமென்றும், புதிய டாஸ்மாக் கடைகளை திறக்கக்கூடாது என தீர்மானங்களை நிறைவேற்றி தமிழகஅரசுக்கு அனுப்பி வைக்குமாறு, அனைத்து பஞ்சாயத்து தலைவர்களையும் மக்கள் சக்தி இயக்கம் கேட்டுக்கொள்கிறது என அறிக்கையில் ஏ.சண்முகம் தெரிவித்துள்ளார்.