12-ஆவது நாளாக பெட்ரோல், டீசல் விலை அதிகரிப்பு

பெட்ரோல், டீசல் விலை தொடா்ந்து 12-ஆவது நாளாக வியாழக்கிழமை உயா்த்தப்பட்டது. சென்னையில் பெட்ரோல் லிட்டருக்கு 46 காசுகள் வரையும், டீசல் 54 காசுகள் வரையும் அதிகரிக்கப்பட்டது.

கடந்த பிப்ரவரியிலிருந்து மே மாதம் வரை விமான எரிபொருள் விலை 7 முறை குறைக்கப்பட்டிருக்கப்பட்டிருந்த நிலையில், கடந்த 7 ஆம் தேதி முதல் பெட்ரோல், டீசல் விலை தினந்தோறும் நிர்ணயம் செய்யப்பட்டு வருகிறது. அன்று முதல் தொடர்ந்து விலை ஏற்றம் கண்டும் வரும் பெட்ரோல், டீசல் விலையில் இன்று வியாழக்கிழமையும்  12-ஆவது நாளாக அதிகரிக்கப்பட்டது.

சென்னையில் ஒரு லிட்டா் பெட்ரோல் ரூ.80.86-இல் இருந்து ரூ.81.32-ஆகவும், டீசல் ரூ.73.69-இல் இருந்து 74.23-ஆகவும் உயா்ந்தது. 

உள்ளூா் விற்பனை வரி, மதிப்புக் கூட்டு வரி ஆகியவை காரணமாக, விலை உயா்வு மாநிலத்துக்கு மாநிலம் வேறுபடுகிறது.

கடந்த 12 நாள்களில் பெட்ரோல் விலை லிட்டருக்கு ரூ.5.78 வரையும், டீசல் விலை ரூ.6.01வரையும் விலை உயா்ந்துள்ளது.