சென்னை மெட்ரோ ரயில்களில் மே மாதத்தில் 84.21 லட்சம் பேர் பயணம்!

சென்னை: 2024 மே மாதத்தில் 84.21 லட்சம் பயணிகள் சென்னை மெட்ரோ ரயில்களில் பயணித்ததாக சென்னை மெட்ரோ ரயில் நிர்வாகம் தெரிவித்துள்ளது.

2024 ஏப்ரல் மாதத்தில் 80.87 லட்சம் பயணிகள் பயணித்துள்ளனர்.

இது குறித்து சென்னை மெட்ரோ ரயில் நிர்வாகம் வெளியிட்ட செய்திக்குறிப்பு:

சென்னை மெட்ரோ ரயில் நிறுவனம், சென்னையில் உள்ள மக்களுக்கும், மெட்ரோ ரயில் பயணிகளுக்கும் போக்குவரத்து வசதியை அளித்து வருவதோடு நம்பக தன்மையான பாதுகாப்பான வசதியை வழங்கி வருகிறது.

அந்த வகையில் கடந்த மாதம் சென்னை மெட்ரோ ரயில்களில் 84,21,072 பயணிகள் பயணம் செய்துள்ளனர்.

மேலும் 1.1.2024 முதல் 31.1.2024 வரை மொத்தம் 84,63,384 பயணிகள் மெட்ரோ ரயில்களில் பயணம் செய்துள்ளனர்.

1.2.2024 முதல் 29.2.2024 வரை மொத்தம் 86,15,008 பயணிகள் மெட்ரோ ரயில்களில் பயணம் செய்துள்ளனர்.

1.3.2024 முதல் 31.3.2024 வரை மொத்தம் 86,82,457 பயணிகள் மெட்ரோ ரயில்களில் பயணம் செய்துள்ளனர்.

1.4.2024 முதல் 30.4.2024 வரை மொத்தம் 80,87,712 பயணிகள் மெட்ரோ ரயில்களில் பயணம் செய்துள்ளனர்.

அதிகபட்சமாக 10.5.2024 அன்று 3,03,109 பயணிகள் மெட்ரோ ரயில்களில் பயணம் செய்துள்ளனர்.

2024, மே மாதத்தில் மட்டும் க்யுஆர் குறியீடு (QR Code) பயணச்சீட்டு முறையைப் பயன்படுத்தி 36,97,773 பயணிகள், பயண அட்டைகளை(Travel Card Ticketing System) பயன்படுத்தி 32,10,776 பயணிகள், டோக்கன்களை பயன்படுத்தி 52,055 பயணிகள், குழு பயணச்சீட்டு (Group Ticket) முறையை பயன்படுத்தி 5,307 பயணிகள் மற்றும் சிங்கார சென்னை அட்டையை (தேசிய பொது இயக்க அட்டை) பயன்படுத்தி 14,55,161 பயணிகள் மெட்ரோ ரயில்களில் பயணம் செய்துள்ளனர்.

சென்னை மெட்ரோ ரயில் நிறுவனம் மெட்ரோ ரயில்களில் பயணிப்பவர்களுக்கு க்யுஆர்குறியீடு பயணச்சீட்டு, பயண அட்டைகள், வாட்ஸ்அப் டிக்கெட், Paytm App மற்றும் PhonePe போன்ற அனைத்து வகையாக பயணச்சீட்டுகளுக்கும் 20% கட்டணத் தள்ளுபடி வழங்குகிறது.

சென்னை மெட்ரோ ரயில் நிறுவனத்தின் வாட்ஸ்அப் டிக்கெட் (+91 83000 86000)மூலமாக மற்றும் பேடிஎம் ஆப் மூலமாகவும் பயணிகள் தங்கள் பயணச்சீட்டுகளை பெற்று கொள்ளலாம் எனத் தெரிவித்துள்ளது.

மெட்ரோ ரயில்கள் மற்றும் மெட்ரோ ரயில் நிலையங்களை பராமரிப்பதில் மிகுந்த ஒத்துழைப்பு நல்கிவரும் அனைத்து பயணிகளுக்கும் நன்றி தெரிவித்துள்ளது சென்னை மெட்ரோ ரயில் நிர்வாகம்.

மேலும், சமீபத்திய நேர்காணல் ஒன்றில் பிரதமர் மோடி, சில மாநிலங்களில் இலவசப் பேருந்துகள் பயன்பாடு உள்ளதால், மெட்ரோ ரயில்களின் பயன்பாடு குறைந்து, மெட்ரோவின் மூலம் அரசுக்கு வரும் வருவாய் குறைந்து வருவதாகக் கூறியிருந்தார். அதற்குப் பதிலளிக்கும் விதமாக, முதல்வர் ஸ்டாலின் தனது எக்ஸ் பக்கத்தில், ”மகளிருக்கான இலவசப் பேருந்துத் திட்டத்தினால் மெட்ரோ ரயிலின் பயன்பாடு குறைந்து வருவதாக கூறுவது, பிரதமர் மோடியின் வீண்பழியே. மெட்ரோ, 2019-இல் 3 கோடியே 28 லட்சம் பயணங்களையும், 2023-இல் 9 கோடியே 11 லட்சம் பயணங்களையும் கொண்டுள்ளது” எனப் பதிவிட்டிருந்தார் என்பது குறிப்பிடத்தக்கது.