உடற்பயிற்சிக் கூடத்தில் நீங்கள் உடற்பயிற்சி செய்யும்போது வேகமான தாளத்துடன் கூடிய துள்ளல் பாடல்களை கேட்பது பயிற்சியின் முழு நன்மைகளையும் பெற வைக்கும் என்று ஆய்வாளர்கள் கூறுகின்றனர்.
பொதுவாக எந்த ஒரு செயலையும் சிறப்பாக மன அமைதியுடன் செய்வதற்கு இசை முக்கியக் காரணியாக இருக்கிறது. அந்த வகையில், நம்மை பாதிக்கும் இசையின் குறிப்பிட்ட பண்புகள் உடற்பயிற்சியின்போது என்ன மாதிரியான மாற்றத்தை ஏற்படுத்துகின்றன என்பது குறித்து ஆராய்ச்சியாளர்கள் ஆய்வு செய்து இந்த முடிவினை வெளியிட்டுள்ளனர்.
உடற்பயிற்சி கூடத்தில் பாடல்கள் கேட்பது உடற்பயிற்சியின் நன்மைகளை அதிகரிக்கக்கூடும் என்பது பல்வேறு கட்ட ஆய்வின் மூலமாக உறுதிப்படுத்தப்பட்டுள்ளது.
அதிக தீவிரம் கொண்ட பயிற்சிகள், டிரெட்மில்லில் நடப்பது போன்ற கடினமான பயிற்சிகளின் போது அதிகவேக தாளத்துடன் கூடிய பாடல்களை கேட்கலாம். அவ்வாறு கேட்கும்போது, நாம் உடல் சோர்வை மறந்து, சுறுசுறுப்புடன் பயிற்சியில் ஈடுபட உதவும்.
'உடற்பயிற்சி செய்யும் போது துள்ளல் பாடல்களை கேட்கும்போது, இதயத் துடிப்பு அதிகமாகிறது. இதனால் இதய செயல்பாடுகள் சீராகின்றன. எனவே, உடல் சோர்வு மட்டுமின்றி பயிற்சியின் முழுமையான பலனைப் பெற முடிகிறது' என்று இத்தாலியின் வெரோனா பல்கலைக்கழகத்தின் பேராசிரியர் லூகா ஆர்டிகோ கூறுகிறார்.