சர்க்கரை அதிகம் உட்கொள்வது ஆண்களா..? பெண்களா..?

ஆண்களை விட பெண்களே அதிகளவில் சர்க்கரை உட்கொள்வதாக ஆய்வு ஒன்றில் தெரிய வந்துள்ளது.

ஹைதராபாத்தில் உள்ள இந்திய மருத்துவ ஆராய்ச்சி கவுன்சில் (ஐ.சி.எம்.ஆர்) மற்றும் தேசிய ஊட்டச்சத்து நிறுவனம் (என்.ஐ.என்) இணைந்து ஒரு ஆய்வை மேற்கொண்டுள்ளது. இதற்கு இந்தியாவில் உள்ள சர்வதேச வாழ்க்கை அறிவியல் நிறுவனம்  நிதியுதவி அளித்துள்ளது.

கணக்கெடுப்பின்படி, பெண்கள் ஒரு நாளில் 20.2 கிராம் சர்க்கரையை எடுத்துக்கொள்கிறார்கள். ஆண்கள் நாள் ஒன்றுக்கு எடுத்துக்கொள்ளும் சர்க்கரை அளவு 18.7 கிராம் ஆகும். இந்த ஆய்வின் மூலமாக ஆண்களை விட பெண்களே அதிகளவு சர்க்கரை எடுத்துகொள்கிறார்கள் எனத் தெரிவிக்கப்பட்டுள்ளது. 

இதில் குறிப்பிடத்தக்க விஷயம் என்னவென்றால், இந்தியாவின் மெட்ரோ நகரங்களில், எடுத்துக்கொள்ளப்படும் சர்க்கரையின் அளவு மும்பையில் அதிகமாகவும், ஹைதராபாத்தில் குறைவாகவும் உள்ளது.

மும்பை மற்றும் அகமதாபாத் மக்கள்தொகையின் சராசரி சர்க்கரை உட்கொள்ளும் அளவு முறையே 26.3 கிராம் மற்றும் 25.9 கிராம். தில்லியில் 23.2 கிராம். பெங்களூரு- 19.3 கிராம், கொல்கத்தா -17.1 கிராம் மற்றும் சென்னை -16.1 கிராம்.

அனைத்து மெட்ரோ நகரங்களிலும் சேர்த்து சராசரியாக ஒரு நாளைக்கு 19.5 கிராம் சர்க்கரை எடுத்துக்கொள்ளப்படுகிறது. சர்க்கரை உட்கொள்வதன் மூலமாக கிடைக்கப்பெறும் எனர்ஜி அளவும் நிர்ணயிக்கப்பட்டுள்ளது. அதன்படி, மும்பையில் 6.6% , அதைத் தொடர்ந்து தில்லி (6.1%), அகமதாபாத் (5.9%), ஹைதராபாத் (5.4%) பெங்களூரு (4.1%), சென்னை (3.9%), கொல்கத்தா (3.5%) முறையே இடம்பெற்றுள்ளன.  

தொடர்ந்து, வயதின் அடிப்படையில் எடுக்கப்பட்ட கணக்கெடுப்பின்படி, பொதுவாக, வயதானவர்கள், இளையவர்களை விட சற்றே அதிகமாக சர்க்கரை உட்கொள்வது தெரிய வந்துள்ளது. 36-59 வயதுடையவர்கள் ஒரு நாளைக்கு 20.5 கிராம், 60 வயதுக்கு மேற்பட்டவர்கள் ஒரு நாளைக்கு 20.3 கிராம் சர்க்கரை எடுத்துக்கொள்வதாக ஆய்வில் தெரிவிக்கப்பட்டுள்ளது. 

அதேபோன்று, இளம் பருவத்தினர் ஒரு நாளைக்கு சராசரியாக 19.9 கிராம் சர்க்கரை 18-25 வயதுடையவர்கள் நாள் ஒன்றுக்கு19.4 கிராம், பள்ளிக் குழந்தைகள் 17.6 கிராம் 5 வயதுக்குட்பட்ட குழந்தைகள் 15.6 கிராம் சர்க்கரை சேர்க்கிறார்கள்.