வெங்காயத்தில் கார்போஹைட்ரேட், புரதம், இரும்பு, கால்சியம், பாஸ்பரஸ், பொட்டாசியம், நீர்ச்சத்துக்கள் உள்ளன. வெங்காயத்தை உணவில் சேர்த்து வந்தால் பல்வேறு உடல்நலப் பிரச்னைகளுக்கு உதவும் என்பது அனைவருக்கும் தெரிந்ததுதான். ஆனால், வெங்காயம் அழகுக்கும் பயன்படும் என்பது தெரியுமா?
எப்படி பயன்படுத்துவது?
♦ தலைமுடி உதிர்வுக்கு தீர்வாக வெங்காயச் சாறை பயன்படுத்தலாம். அதாவது வெங்காயச் சாறை தலைமுடியின் வேர்க்கால்களில் நன்றாகப் படும்படி மசாஜ் செய்து 20-30 நிமிடம் கழித்து குளிக்க வேண்டும்.
♦ தலையில் பொடுகு உள்ளிட்ட பிரச்னைகளுக்கும் இது சிறந்த தீர்வாக இருக்கும்.
♦ வெங்காயச் சாறுடன் கற்றாழை ஜெல்லை கலந்து அத்துடன் சில துளிகள் தேங்காய் எண்ணெய் விட்டு பின்னர் தலைமுடியின் ஸ்கால்ப்பில் தடவ வேண்டும். 30 நிமிடம் கழித்து ஷாம்பூ கொண்டு அலசலாம். இதனால் தலைமுடி பளபளப்பாகும்.
இதையும் படிக்க | புற்றுநோயைக் குணப்படுத்த முடியுமா? பரவக்கூடியதா? -நம்பிக்கையும் உண்மையும்
♦ சருமத்தில் பருக்கள் இருந்தால் வெங்காயச் சாறை தடவி சில நிமிடங்கள் கழித்து கழுவ வேண்டும்.
♦ கரும்புள்ளிகள் இருந்தால் வெங்காயச் சாறுடன் தேன் கலந்து தடவலாம்.
♦நகம் சிலருக்கு எளிதாக ஒடிந்துவிடும். எனவே, நகம் வலிமையாக இருக்க தண்ணீரில் வெங்காயச் சாறை விட்டு அதில் நகங்களை சிறிது நேரம் நனைக்க வேண்டும்.
♦தயிருடன் சிறிது அவோகேடா பழம்/பழச்சாறு, மேலும் வெங்காயச் சாறு சேர்த்து முகத்தில் தடவி 15-20 நிமிடங்கள் கழித்து அலசவும். இது வயதான தோற்றத்தைத் தவிர்த்து சருமத்தை இளமையாக வைத்திருக்க உதவும்.
♦ வெங்காயச் சாறு, எலுமிச்சை நீரும் சேர்த்தும் சருமத்திற்கு பயன்படுத்தலாம்.
♦ வெங்காயச் சாறை முகத்தில் தடவுவதற்கு முன்னதாக உடலில் சிறு பகுதியில் முதலில் அப்ளை செய்து அழற்சி எதுவும் ஏற்படுகிறதா என்று பார்த்துவிட்டு பின்னர் பயன்படுத்தவும். உங்களுக்கு ஏற்கெனவே சரும அழற்சி இருக்கும்பட்சத்தில் சருமத்தில் நேரடியாகப் பயன்படுத்துவதைத் தவிர்த்துவிடலாம்.
இதையும் படிக்க | டெங்கு பரவல்: என்னென்ன உணவுகளைச் சாப்பிட வேண்டும்?