முட்டையின் மஞ்சள்கருவை சாப்பிடக்கூடாதா?

முட்டை புரதச்சத்து அதிகமுள்ள, நம் அன்றாட உணவில் சேர்த்துக்கொள்ள வேண்டிய ஓர் உணவுப் பொருள். சிறு குழந்தைகள் முதல் பெரியவர்கள் வரை இதனைச் சாப்பிட சுகாதார நிபுணர்கள் பரிந்துரைக்கின்றனர்.

இதில் வைட்டமின் ஏ, டி, ஈ, கே, பி2, பி6, பி12, போலேட், பயோட்டின் ஆகிய சத்துகளும் கால்சியம், பாஸ்பரஸ், பொட்டாசியம், சோடியம், இரும்பு, மெக்னீசியம், மாங்கனீசு, செலினியம், ஜிங்க் ஆகிய தாதுக்களும் ஆன்ட்டி-ஆக்சிடன்ட் எனும் நோயெதிர்ப்புப் பொருள்களும் அதிகம் உள்ளன.

ஒரு முட்டையில் 75 கலோரிகள் உள்ளன. 7 கிராம் புரோட்டீன், 5 கிராம் கொழுப்பு, 1.6 கிராம் இரும்பு, வைட்டமின், தாதுக்கள், கரோட்டினாய்டுகள் ஆகியவை உள்ளன.

இதுவரை 20 அமினோ அமிலங்கள் கண்டறியப்பட்டுள்ள நிலையில் 11 அமினோ அமிலங்களை உடலே உற்பத்தி செய்யும். எஞ்சிய 9 அமினோ அமிலங்களை உணவு மூலமாகவே உடல் பெற முடியும். இந்த அத்தியாவசிய 9 அமினோ அமிலங்கள் கொண்ட ஒரே உணவுப்பொருள் 'முட்டை' என்பது கூடுதல் தகவல்.

ஒட்டுமொத்த முட்டையின் புரத அளவில் 50%க்கும் மேலான புரதம் அல்புமென் எனும் வெள்ளைக்கருவில் உள்ளது. வெள்ளைக்கருவில் ஓவல்புமின் என்ற புரதம் அதிகமாக உள்ளது. நீர்ச்சத்தில் 90% வெள்ளைக்கருவில்தான் இருக்கிறது. வைட்டமின்களில் பி2, பி5 மட்டுமே இதில் உள்ளது. இந்த வைட்டமின்களின் அளவும் மிகக் குறைவே.

வெள்ளைக்கருவில் ஒரு சதவீதம் கூட கொழுப்பு கிடையாது. எனவே டயட்டில் இருப்பவர்கள் வெள்ளைக்கரு மட்டும் சாப்பிடுகின்றனர்.

ஆனால், முட்டையின் முழுச் சத்துகளைப் பெற இரண்டையும் அதாவது முழுவதுமாக முட்டையை சாப்பிட வேண்டும் என்றே மருத்துவர்கள் பரிந்துரை செய்கிறார்கள்.

வெள்ளைக்கருவில் 18 கிராம் கலோரி, புரதம் 4 கிராம், வைட்டமின் பி2, பி5 சத்துகள் உள்ளன.

இதையும் படிக்க | கர்ப்ப காலத்தில் பல் சிகிச்சை செய்யலாமா? - நம்பிக்கையும் உண்மையும்!

அதுவே மஞ்சள் கருவில் 71 கிராம் கலோரி. 6 கிராம் புரதச்சத்து, 5 கிராம் கொழுப்பு உள்ளது. வைட்டமின் பி2, பி5 ஆகியவை வெள்ளைக்கருவைவிட அதிகம் உள்ளன. மேலும் வைட்டமின் ஏ, பி12 உள்ளிட்ட சத்துகள் மஞ்சள்கருவில்தான் இருக்கின்றன.

மேலும், மஞ்சள் கருவில் உள்ள கொழுப்பு ஹெச்.டி.எல்.(லிப்போ புரதம் அதிகமுள்ள கொழுப்பு) எனும் நல்ல கொழுப்பு. அது உடலுக்குத் தேவையானதும்கூட. இந்த கொழுப்பு இதய நோய்களில் இருந்தும் பக்கவாதத்தில் இருந்தும் பாதுகாக்கிறது.

மஞ்சள் கருவில் கலோரி அதிகம் என்றாலும் அதில் சத்துகள் நிறைந்திருப்பதால் அதையும் சாப்பிடவே மருத்துவர்கள் கூறுகிறார்கள்.

கண்கள், மூளை, இதயம், தசைகள் என ஒட்டுமொத்த உடல் ஆரோக்கியத்துக்குமான உணவுதான் முட்டை.

இதையும் படிக்க |கலப்பட மஞ்சளைக் கண்டறிவது எப்படி?

தினமும் முட்டை சாப்பிடலாமா?

முட்டை ஒரு முழுமையான புரதம் மிக்க உணவு. எனவே, இதனை தினமும் சாப்பிடலாம்.

தினமும் சராசரியாக முட்டை எடுத்துக் கொண்டவர்களுக்கு இதய நோய் பாதிப்பு குறைந்துள்ளது ஆய்வுகளில் உறுதி செய்யப்பட்டுள்ளது.

முட்டை சாப்பிட்டால் உடல் எடை அதிகரிக்கும் என்று சிலர் கூறுவதுண்டு. ஆனால் உண்மையில் முட்டை உடல் எடையைக் குறைக்கிறது.

முட்டையை தனியாக சாப்பிடும்போது உடலுக்குத் தேவையான சத்து கிடைப்பதுடன் உடல் எடையைக் குறைக்கும். இது உடலில் கொழுப்பைக் கரைக்கிறது. பசியைக் குறைக்கிறது. கலோரி குறைவு என்பதாலும் உடல் எடை அதிகரிக்காது.

முடிந்தவரை மற்ற உணவுடன் முட்டை சேர்த்து சாப்பிடுவதைத் தவிர்க்கவும்.

முட்டையில் ஒமேகா 3 ஃபேட்டி ஆசிட் என்ற கொழுப்பு அமிலம் உள்ளதால் உடல் எடையைக் குறைப்பதுடன் இதயத்தை பாதுகாக்கிறது. மேலும் முட்டையில் நோயை எதிர்க்கக்கூடிய சத்துகள் உள்ளன.

பெரியவர்கள் நாள் ஒன்றுக்கு 2-3 முட்டை தாராளமாக சாப்பிடலாம். குழந்தைகளுக்கும் தினமும் ஒன்று கொடுக்கலாம் என்கின்றனர் மருத்துவர்கள். அதேநேரத்தில் முட்டையை வேகவைக்காமல் சாப்பிடுவது தொற்றை ஏற்படுத்தும் என்று எச்சரிக்கின்றனர்.

அதாவது ஹாப்-பாயில், அப்படியே குடிப்பதைத் தவிர்க்கவும். மாறாக முட்டையை அவித்தோ, ஆம்லெட் அல்லது பொடி மாஸ் செய்தோ சாப்பிடலாம். அதாவது முழுவதுமாக வேகவைத்து சாப்பிடலாம்.