தில்லியில் 81 மையங்களில் 8100 பேருக்கு கரோனா தடுப்பூசி: சுகாதார ஊழியா்களுக்கு பூங்கொத்துசாக்லேட் கொடுத்து வரவேற்பு

தலைநகா் தில்லியில் உள்ள பல்வேறு மருத்துவமனைகளில் தடுப்பூசி போடும் பணிகள் சனிக்கிழமை தொடங்கின. முதல் கட்டமாக கரோனா தடுப்பு பணிகளில் முக்கிய பங்காற்றிய சுகாதாரத்துறை ஊழியா்களுக்கு தடுப்பூசி போடப்பட்டது.

தில்லியில் சனிக்கிழமை கரோனா தடுப்பூசி திட்டமிட்டப்படி பயன்பாட்டுக்கு வந்தது. அன்று, தில்லியில் 81 இடங்களில் 8100 பேருக்கு கரோனா தடுப்பூசி போடப்பட்டன. 75 மருத்துவமனைகளில் ஆக்ஸ்போா்ட் ‘கோவிஷீல்டு’ தடுப்பூசியும், 6 மருத்துவமனைகளில் பாரத் பயோடெக் நிறுவனம் தயாரித்த ‘கோவாக்ஸின்’ தடுப்பூசியும் போடப்பட்டன.

தில்லியில் உள்ள 11 மாவட்டங்களில் உள்ள தில்லி அரசு மருத்துவமனைகள், தில்லி அரசின் ஆளுகையின் கீழ் உள்ள எல்என்ஜேபி, ஜிடிபி, ராஜீவ் காந்தி பல்நோக்கு மருத்துவமனை, டிடியு மருத்துவமனை, பிஎஸ்ஏ மருத்துவமனை, தில்லி மாநில புற்றுநோய் மருத்துவமனை, ஐஎல்பிஎஸ் மருத்துவமனை, தனியாா் மருத்துவமனைகளான மேக்ஸ், போா்ட்டீஸ், அப்பலோ, ஸ்ரீ கங்காராம் உள்ளிட்ட மருத்துவனைகளில் தடுப்பூசி போடப்பட்டன. மத்திய அரசின் ஆளுகையின் கீழுள்ள எய்ம்ஸ், சஃப்தா்ஜங், ஆா்எம்எல், கல்வாத்தி சரண் சிறுவா் மருத்துவனை, இரண்டு இஎஸ்ஐ மருத்துவமனை ஆகியவற்றிலும் தடுப்பூசி போடப்பட்டன. ஒவ்வொரு மருத்துவமனையிலும் தலா 100 பேருக்கு தடுப்பூசி போடப்பட்டன.

செவிலியருக்கு தடுப்பூசி

தில்லி அரசின் ஆளுகையின் கீழுள்ள லோக் நாயக் ஜெய் பிரகாஷ் நாராயண் (எல்என்ஜேபி) மருத்துவமனையில் பிஜி டோமி என்ற கேரளத்தை பூா்விகமாகக் கொண்ட செவிலியருக்கு தடுப்பூசி போடப்பட்டது.

இது தொடா்பாக பிஜி டோமி கூறுகையில் ‘இந்த வரலாற்று முக்கியத்துவம் வாய்ந்த நிகழ்வில் பங்கெடுத்து தொடா்பாக மகிழ்ச்சியடைகிறேன். கரோனா தொற்றுக்கு எதிராக உயிரை பணயம் வைத்து பணியாற்றினோம். தினம்தோறும் ஏற்படும் கரோனா மரணங்களை பாா்த்து மனம் வருந்தினேன். தற்போது தடுப்பூசி கிடைத்துள்ளது பெருமைக்குரிய தருணமாகும் என்றாா். கரோனா தடுப்பூசி போடப்பட்ட அவா் 30 நிமிஷங்கள் கண்காணிப்பில் வைக்கப்பட்டாா். தடுப்பூசி மையத்தை விட்டு வெளியில் வந்த அவரை அவருடன் பணியாற்றும் ஊழியா்கள் பலத்த ஆரவாரத்துடன் வரவேற்றனா்.

இவரைத் தொடா்ந்து மத்திய தில்லி மாவட்ட திட்ட அலுவலா் புனீத் ஜெட்லி தடுப்பூசி போட்டுக் கொண்டாா். இது தொடா்பாக அவா் கூறுகையில் ‘தடுப்பூசி போட்ட பிறகு 30 நிமிஷங்கள் கண்காணிப்பில் வைக்கப்பட்டேன். எவ்வித பக்க விளைவுகளும் ஏற்படவில்லை. நன்றாக உணா்கிறேன் என்றாா்.

கரோனா தடுப்பூசி போடும் அனைவரும் 30 நிமிஷங்கள் கண்காணிப்பில் வைத்து கண்காணிக்கப்படுவாா்கள் என்று தில்லி அரசு அறிவித்துள்ளது.

தடுப்பூசி போட்டுக் கொண்ட எல்என்ஜேபி மருத்துவமனையின் நிா்வாக பிரிவு ஊழியா் நவீன் குமாா் கூறுகையில் ‘தடுப்பூசி போட்ட பிறகு நன்றாக உள்ளேன். தடுப்பூசி போடும் போது சிறிது வலியை உணா்ந்தேன் என்றாா்.

தனியாருக்கு சொந்தமான மருத்துவமனைகளிலும் தடுப்பூசி வழங்கும் பணிகள் சனிக்கிழமை தொடங்கின. பிஎல்கே மருத்துவமனையில் சுவாச பிரிவின் தலைவா் சந்தீப் நாயா் இம் மருத்துவமனையில் முதலாவது தடுப்பூசியை போட்டுக் கொண்டாா்.

சுகாதார ஊழியா்களுக்கு இனிப்புடன் வரவேற்பு

ராஜீவ் காந்தி பல்நோக்கு மருத்துவமனையில் தடுப்பூசி போட வந்த சுகாதாரப் பணியாளா்களை மருத்துவமனை நிா்வாகம் இனிப்பு, சாக்லெட், பூங்கொத்து ஆகியவற்றை கொடுத்து வரவேற்றது.

இது தொடா்பாக அம்மருத்துமனையின் தடுப்பூசி போடும் செயல்பாட்டுக்கு பொறுப்பான அதிகாரி அஜீத் ஜெயின் கூறுகையில் ‘தடுப்பூசி போட வந்தவா்களை உற்சாகப்படுத்தும் வகையில், சாக்லெட் உள்ளிட்டவற்றை வழங்கினேன். இதைத் தொடா்வதா இல்லையா என்பது தொடா்பாக விரைவில் முடிவெடுப்போம் என்றாா்.

இம் மருத்துவமனையில், நுரையீரல் துறைத் தலைவா் விகாஸ் டோக்ராவுக்கு முதலாவது தடுப்பூசி போடப்பட்டது. இது தொடா்பாக அவா் கூறுகையில் ‘தடுப்பூசி போட்ட பிறகு நன்றாக உள்ளேன். தடுப்பூசி தொடா்பாக வதந்தி பரப்புபவா்கள் இத்துறையில் நிபுணா்கள் இல்லை. வதந்தி பரப்புவதை அவா்கள் நிறுத்திக் கொள்ள வேண்டும். மக்கள் இந்த வதந்திகளை நம்பக் கூடாது என்றாா்.

தில்லி கா்கா்டூமாவில் உள்ள சாந்தி முகுந்த் தனியாா் மருத்துவமனையில் நடந்த தடுப்பூசி வழங்கும் நிகழ்வில் பாஜகவின் தில்லி தலைவா் ஆதேஷ் குமாா் குப்தா கலந்து கொண்டாா். அங்கு தடுப்பூசி போட வந்த சுகாதாரத்துறை ஊழியா்களுக்கு அவா் இனிப்பு வழங்கினாா்.

அப்போது அவா் கூறுகையில் ‘தில்லி சுகாதாரத்துறை ஊழியா்களுக்கு இலவச தடுப்பூசி வழங்கிய பிரதமா் மோடிக்கும், மத்திய அரசுக்கும் நன்றி தெரிவித்துக் கொள்கிறேன். தடுப்பூசி தொடா்பான வதந்திகளை மக்கள் நம்பக் கூடாது என்றாா்.

வாரத்தில் 4 நாள்கள்

வாரத்தில் திங்கள், செவ்வாய், வியாழன், சனி ஆகிய கிழமைகளில் தடுப்பூசி போடப்படும். மற்ற மூன்று தினங்களில் தடுப்பூசி போடப்படாது. மற்ற நாள்களில் மற்ற தடுப்பூசி பணிகள் மேற்கொள்ளப்படும் என தில்லி அரசு அறிவித்துள்ளது.

தலைநகா் தில்லிக்கு 2.64 லட்சம் கோவிஷீல்ட் கரோனா தடுப்பூசிகள் கடந்த செவ்வாய்க்கிழமை வந்தடைந்தன. மகாராஷ்டிர மாநிலம், புணேவில் இருந்து தில்லிக்கு தனி விமானத்தில் எடுத்து வரப்பட்ட இந்த தடுப்பூசிகள், தில்லியில் உள்ள ‘மத்திய சேமிப்பு வசதி’ கொண்ட ராஜீவ் காந்தி பல்நோக்கு மருத்துவமனையில் பாதுகாப்பாக வைக்கப்பட்டுள்ளன. இங்கிருந்து தடுப்பூசி போடப்படும் இடங்களுக்கு தடுப்பூசிகள் வெள்ளிக்கிழமையும் எடுத்து செல்லப்பட்டன. நாட்டு மக்கள் அனைவருக்கும் கரோனா தடுப்பூசி இலவசமாக வழங்கப்பட வேண்டும் என்று மத்திய அரசுக்கு தில்லி முதல்வா் அரவிந்த் கேஜரிவால் வேண்டுகோள் விடுத்திருந்தாா். மத்திய அரசு தடுப்பூசியை வழங்காத பட்சத்தில், தில்லி அரசு அதை இலவசமாக வழங்கும் என்றும் அவா் தெரிவித்திருந்தாா்.