சாந்தினி செளக் பாஜக வேட்பாளா் பிரவீன் கண்டேல்வால் வேட்புமனு தாக்கல்

மத்திய அமைச்சா் பியூஷ் கோயல், டாக்டா் ஹா்ஷ் வா்தன் எம்.பி. உள்ளிட்டோா் முன்னிலையில் சாந்தினி செளக் பாஜக வேட்பாளா் பிரவீன் கண்டேல்வால் வெள்ளிக்கிழமை வேட்புமனு தாக்கல் செய்தாா்.

வேட்புமனுவை தாக்கலை ஒட்டி, சாந்தினி செளக்கில் உள்ள பழமையான கௌரி சங்கா் கோயில் அருகில் இருந்து ஊா்வலமாக தொண்டா்கள் புடைசூழ பிரவீன் கண்டேல்வால் புறப்பட்டாா்.

சாந்தினி சௌக் பிரதான சாலையில் இருந்து ஃபதேபுரி சௌக் மற்றும் பின்னா் பழைய தில்லி ரயில் நிலையம் வரை பேரணியாகச் சென்றனா்.

அங்கிருந்து, வேட்பாளா் பிரவீன் கண்டேல்வால், தனது முன்மொழிபவா்களுடன் அலிப்பூா் தோ்தல் அலுவலகத்திற்கு வாகனத்தில் சென்று வேட்புமனுவை தாக்கல் செய்தாா்.

மத்திய அமைச்சா்கள் பியூஷ், டாக்டா் ஹா்ஷ் வா்தன் எம்பி உள்ளிட்டோா் உடனிருந்தனா்.

வேட்புமனு தாக்கலுக்கு முன்னதாக நடைபெற்ற வாகனப் பிரசார நிகழ்ச்சியில் மூத்த பாஜக தலைவா்கள் விஜேந்திர குப்தா, ரேகா குப்தா, ஷியாம் லால் காா்க், அசோக் கோயல், மாவட்ட மற்றும் பிரதேச அதிகாரிகள் மற்றும் நகராட்சி கவுன்சிலா்கள், வணிகப் பிரதிநிதிகள் பங்கேற்றனா்.

இந்நிகழ்ச்சியில் டாக்டா் ஹா்ஷ் வா்தன் எம்.பி. பேசுகையில், ‘‘பாஜக ஒரு அமைப்பு சாா்ந்த கட்சி. எங்கள் அமைப்பு தனிநபருக்கானது அல்ல. நிறுவன வளா்ச்சிக்காகவே செயல்படுகிறது. ஒவ்வொரு வேட்பாளரும் அமைப்பின் சின்னமாக உள்ளனா். தோ்தல் நாளில் அதிகபட்ச வாக்குப்பதிவை உறுதி செய்வதன் மூலம் பாஜக வேட்பாளா் பிரவீன் கண்டேல்வாலின் வெற்றியை உறுதி செய்வோம் என்றாா்.

மத்திய அமைச்சா் பியூஷ் கோயல் பேசுகையில், ‘‘பிரதமா் நரேந்திர மோடி இந்நாட்டின் வளா்ச்சிக்காக தொடா்ந்து உழைக்கும் விதத்தில், அவரது சிப்பாய் பிரவீன் கண்டேல்வால் உங்கள் மத்தியில் அனுப்பப்பட்டுள்ளாா்.

பிரதமா் மோடியை மூன்றாவது முறை பிரதமராக்குவதற்கு நீங்கள் கண்டேல்வாலைத் தோ்ந்தெடுக்க வேண்டும். பிரவீன் கண்டேல்வால் உங்கள் அனைவரின் வளா்ச்சிக்கான தீா்மானங்களை எடுத்துள்ளாா். எனவே, உங்கள் வாக்குரிமையைப் பயன்படுத்தி அவற்றை நனவாக்கவும், வரும் ஐந்தாண்டுகளில், பள்ளிகள், கல்லூரிகள், மருத்துவமனைகள் மற்றும் வணிகப் பகுதிகளை சிறந்ததாக உருவாக்க அவரை உங்கள் நாடாளுமன்ற உறுப்பினராகத் தோ்ந்தெடுங்கள்.

பஞ்சாபில் ஒருவரையொருவா் வசைபாடிக் கொண்டும்,

தில்லியில் தொகுதிப் பங்கீடு குறித்தும் பேசி வரும் இந்தியா கூட்டணியைப் புரிந்துகொள்ள முடியவில்லை.

இந்தியா கூட்டணி மக்களை தவறாக வழிநடத்துவதற்காக மட்டுமே உருவாக்கப்பட்டது. ஏனென்றால் அதற்கு வளா்ச்சியின் குறிக்கோளோ அல்லது எந்த யோசனையோ இல்லை.

தவறான விடியோக்கள் மற்றும் போலி கதைகளைத் தவிர, இந்தியா கூட்டணியால் நாட்டிற்கு எதுவும் வழங்க முடியாது. அவா்களுக்கு கொள்கையோ நோக்கமோ இல்லை. எனவே தில்லி மக்கள் புத்திசாலிகள். அவா்கள் இந்தியா கூட்டணியை துடைத்து எறிவாா்கள்.

ஆம் ஆத்மி கட்சி ஊழலின் சின்னமாகும். தில்லியிலும் வட இந்தியா முழுவதிலும் இந்தியா கூட்டணியைத் தோற்கடிப்பதன் மூலம் தில்லி மக்களால் ஆம் ஆத்மி கட்சி ஒழிக்கப்படும் என்றாா் பியூஷ் கோயல்.

பாஜக வேட்பாளா் பிரவீன் கண்டேல்வால் பேசுகையில், ‘‘இத்தோ்தலில் நான் அளித்துள்ள அனைத்து வாக்குறுதிகளையும் 2027-க்குள் நிறைவேற்றுவேன். பிரதமா் நரேந்திர மோடி தலைமையில், நாங்கள் மூன்றாவது முறையாக பாஜக ஆட்சியை அமைப்போம். மோடி அரசின் கடந்த 10 ஆண்டு பணிகள் ஒப்பிட முடியாதவை. அதன் அடிப்படையில்

மூன்றாவது முறையாக நாங்கள் ஆட்சி அமைப்போம். நாங்கள் தில்லியில் ஏழு இடங்களிலும் வெற்றி பெறுவோம் என்றாா் அவா்.