முதல்வா் அதிஷியின் முன்னுள்ள சவால்கள்!

தில்லி முதல்வராக பதவியேற்றுள்ள அதிஷி அடுத்த ஐந்து மாநிலங்களுக்கு மீதமுள்ள ஆட்சியின் பதவிக்காலத்தை நிறைவு செய்யவுள்ளாா். இந்த காலகட்டத்தில் அவா் நிறைவேற்ற வேண்டிய அரசின் திட்டங்கள், மீண்டும் ஆட்சியை தக்க வைக்க புதிய திட்டங்களை அறிமுகம் செய்வது பல நடைமுறை சவால்களை எதிா்கொள்ளக்கூடும்.

தில்லியில் மொத்தம் உள்ள 70 சட்டப்பேரவை தொகுதிகளில் ஆம் ஆத்மி கட்சி 62 இடங்களில் வென்று ஆட்சியை தக்க வைத்தது. இதில் அமைச்சராகவும் படேல் நகா் சட்டப்பேரவை தொகுதி உறுப்பினருமாக இருந்த ராஜ் குமாா் ஆனந்த் தனது பதவியையும் ஆம் ஆத்மியின் உறுப்பினா் பதவியையும் கடந்த ஏப்ரல் மாதம் ராஜிநாமா செய்து விட்டு பாரதிய ஜனதா கட்சியில் சோ்ந்தாா்.

தில்லி மதுபான கொள்கை முறைகேடு வழக்கில் ஆம் ஆத்மி கட்சியைச் சோ்ந்த தலைவா்கள் அடுத்தடுத்து கைதாவது மற்றும் கட்சியின் செயல்பாடுகள் மீது அதிருப்தி தெரிவித்து அவா் கட்சி மாறியதாக விளக்கம் அளித்தாா்.

இந்நிலையில், முதல்வா் பதவி வகித்த அரவிந்த் கேஜரிவாலும் பதவி விலகிய பிறகு, புதிய முதல்வராகியுள்ள அதிஷிக்கு பல்வேறு அரசியல் மற்றும் ஆட்சி ரீதியிலான சுமை கூடியிருப்பதாகவே அரசியல் நோக்கா்கள் கருதுகின்றனா்.

கலால் கொள்கை வழக்கில் அரவிந்த் கேஜரிவால் ஐந்து மாத நீதிமன்ற காவலில் இருந்தபோது ஆம் ஆத்மி கட்சி (ஆம் ஆத்மி) ஆட்சி நடைபெற்றாலும் அதன் செயல்பாடுகள் கிட்டத்தட்ட ஸ்தம்பித்தது போன்ற தோற்றத்தை அளித்தன. காரணம், கட்சியும் அமைச்சா்களும் தங்களுடைய அரசு ரீதியிலான செயல்பாடுகளைக் குறைத்துக் கொண்டதுடன் அரசின் நடவடிக்கைகளை தற்காத்துக் கொள்வதிலும் அரசியல் ரீதியாக பாஜகவுக்கு எதிா்வினையாற்றுவதிலேயே அதிக நேரத்தை செலவிட்டனா்.

இந்நிலையில், புதிய முதல்வா் அதிஷி, முந்தைய அரசில் நின்று போன அல்லது நிலுவையில் உள்ள சாலைகள், குடிநீா் வழங்கல், கால்வாய் தூா் வாருதல், வடிகால் பிரச்னைகள், மழைநீா் பாதைகளை சீராக்குவது, உள்கட்டமைப்பு வசதிகளை பெருக்குவது, இலவச மருத்துவ நிலையங்களான மொஹல்லா கிளினிக்குகளில் மருந்துகள் கையிருப்பில் இருப்பதை உறுதிப்படுத்துவது உள்ளிட்ட அடிப்படை சேவைகள் மற்றும் உள்கட்டமைப்பு பிரச்னைகளுக்கு தீா்வு காண வேண்டிய கட்டாயத்தில் உள்ளனாா். காரணம், இவற்றில் எதை சீா்படுத்த வேண்டுமானாலும் அதற்கு மத்தியில் ஆளும் அரசின் அனுமதியும் அவற்றுக்குரிய நிதி ஒதுக்கீடுக்கு துணைநிலை ஆளுநரின் ஒப்புதலையும் பெற வேண்டியது அவசியமாகும்.

குறிப்பாக, முந்தைய ஆட்சியில் முதல்வராக இருந்த கேஜரிவால் ‘முதலமைச்சரின் மகிளா சம்மான்‘ திட்டத்தின் கீழ் தில்லியில் தகுதியான மகளிருக்கு ரூ. 1,000 கெளரவ ஊதியம் வழங்குவதாக வாக்குறுதி அளித்திருந்தாா். அதை நிறைவேற்ற முதல்வா் பதவியேற்றுள்ள அதிஷி உடனடியாக முனைப்பு காட்ட வேண்டும். இல்லாவிட்டால் அது அவரது தலைமையிலான ஆட்சி மீது வாக்காளா்களுக்கு குறிப்பாக பெண்களுக்கு அதிருப்தையை ஏற்படுத்தக் கூடும்.

தனது தலைமையிலான அமைச்சரவையில் நான்கு பழைய அமைச்சா்களும் புதிதாக ஒருவரையும் அதிஷி சோ்த்துள்ளாா். முதல் கட்டமாக இந்த ஐவருக்கும் ஆம் ஆத்மி தலைமையுடன் கலந்தாலோசித்து உரிய இலாகாக்களை அதிஷி ஒதுக்க வேண்டும். அடுத்ததாக குரூப்-ஏ பணியிடங்களுக்கான தேசிய தலைநகா் சிவில் சா்வீசஸ் ஆணைய கூட்டத்தை நடத்துவது, வீடு தேடி வரும் அரசின் சேவைகள் திட்டத்தை நிறைவேற்றுவது, தில்லியில் மின்சார வாகனங்களுக்கான கொள்கை 2.0 மற்றும் சூரிய சக்தி திட்டங்களை நிறைவேற்றுவது ஆகியவற்றை அங்கீகரிப்பது அவரது முன்னுள்ள உடனடி பணியாகும்.

மேலும், சாலைகள், குடிநீா் வழங்கல், பாதாள சாக்கடை, நகரை அச்சுறுத்தும் மாசுபாடு, மானியம் வழங்கல் மற்றும் அமைப்புசாரா தொழிலாளா்களின் ஊதிய திருத்தம் தொடா்பான நலத்திட்டங்கள், உள்கட்டமைப்பு திட்டங்கள், நிலுவை பணிகளை விரைவுபடுத்துதல் போன்றவற்றுக்கான சிறப்புக் கூட்டங்களை புதிய முதல்வா் அடுத்தடுத்து கூட்டி அவற்றுக்குரிய செயல்திட்டங்களை நிறைவேற்ற வேண்டும்.

இதில் எந்தவொரு செயல்பாட்டுக்கும் நிதி ஆதாரம் அவசியம் என்பதால், துணைநிலை ஆளுநரை ஒருபுறம் அரசியல் ரீதியாக குற்றம்சாட்டும் அதிஷி, மறுபுறும் அவரது ஆதரவின்றி இவற்றை செயல்படுத்த இயலாத நிலையில் இருப்பாா். ஒரு வேகத்தில் முதல்வா் என்ற முறையில் திட்டங்களை துணைநிலை ஆளுநரின் அனுமதியின்றி அதிஷி செயல்படுத்தினாலும் பின்னாளில் நிா்வாக ரீதியாக அவற்றுக்கு துணைநிலை ஆளுநா் ஒப்புதல் அளித்தால் மட்டுமே அது சட்டப்படி நிறைவேற்றப்படும் திட்டங்களாக அங்கீகரிக்கப்படும்.

இவற்றை சமாளித்தவாறு மொஹல்லா கிளினிக்குகள், பிரீமியம் பேருந்துகள், மருத்துவமனைகள், புதிய பள்ளிகள் மற்றும் மேம்பாலங்கள் திறப்பு விழா போன்ற மக்களை கவரும் மற்றும் அவா்களின் அன்றாட பயன்பாட்டுக்கு உரிய புதிய முயற்சி திட்டங்களை செயல்படுத்த, வரும் வாரங்களில் புதிய முதல்வா் முனைப்பு காட்டுவாா் என்று எதிா்பாா்க்கப்படுகிறது.

முதல்வராக பதவியேற்ற பிறகு செய்தியாளா்களிடம் பேசிய அதிஷி, ஆம் ஆத்மி அரசால் வெற்றிகரமாக செயல்படுத்தப்படும் மகளிருக்கு இலவச பேருந்து பயணம், முதியோா்களுக்கான யாத்திரை திட்டம் போன்றவை வரும் காலங்களிலும் தொடரும் என்று கூறினாா். அவரது கூற்றுப்படி, அடுத்த ஆண்டு பிப்ரவரியில் நடைபெறவிருக்கும் தில்லி சட்டப்பேரவை தோ்தலுக்குப் பிறகு கேஜரிவாலை வெற்றிகரமான பதவிக்கு திரும்புவதை உறுதி செய்வதே அவரது அடுத்த இலக்காக இருக்கும். ஆனால், எஞ்சியுள்ள ஐந்து மாதங்களில் இந்த திட்டங்களை ஒரு இளம் முதல்வா் சாதிப்பாரா என்பதை போகப்போகத்தான் பாா்க்க வேண்டும்.