மோடி 20 நனவாகும் கனவுகள்

மோடி 20 நனவாகும் கனவுகள் - தொகுப்பு ப்ளூகிராஃப்ட் டிஜிட்டல் ஃபவுண்டேஷன் (தமிழில்: மீரா ரவிசங்கர்) ; பக்.440; ரூ. 895; அல்லயன்ஸ் கம்பெனி,  சென்னை - 4; ✆ 044-2464 1314.

எளிய பின்னணியிலிருந்து வந்த நரேந்திர மோடி  ஆளுமைமிக்க தலைவராக ஒவ்வொரு கருத்துக் கணிப்பிலும் அறியப்படுபவர்.  முதல்வராக 12.5 ஆண்டுகளும், பிரதமராக 9 ஆண்டுகளும் இடைவெளியின்றி  20 ஆண்டுகால பயணத்தின் சிந்தனைகளை, செயல்களை வெளிக்கொணர முயன்றிருக்கிறது இந்த நூல்.

சமூக தாக்கம், அரசியல் தாக்கம், பொருளாதாரக் கொள்கை, புதிய மாற்றங்கள், வெளியுறவுக் கொள்கை என 5  பகுதிகளைக் கொண்டுள்ளது. பி.வி. சிந்துவில் தொடங்கி, அமித் ஷா, பொருளாதார நிபுணர் அரவிந்த் பனகரியா, தொழிலதிபர் சுதா மூர்த்தி, தேசிய பாதுகாப்பு ஆலோசகர் அஜித் தோவல், வெளியுறவுத் துறை அமைச்சர் ஜெய்சங்கர் உள்ளிட்ட 21 சமூகப் பெரியோர், அதிகாரிகளின் அனுபவங்களைத் தொகுத்திருக்கிறார்கள். இவை மோடி எவ்வாறு பணியாற்றுகிறார் என்கிற புரிதலை ஏற்படுத்த உதவுகிறது.

இந்தியாவின் பாரம்பரியத்தை மீட்டுருவாக்கம் செய்தது, பழம்பெருமையை விஜயம் செய்த அதிமுக்கிய வெளிநாட்டுப் பிரமுகர்களுக்கு எடுத்துரைத்தது, அனைவருக்குமான வளர்ச்சி என்கிற கொள்கை, திட்டங்கள் என மோடியின் செயல்கள் அவர் புகழை வானளவு உயர்த்தியது என்பதை நூலில் உள்ள அத்தியாயங்கள் எடுத்தியம்புகின்றன. 

ஒவ்வொரு குடிமகனும் தன்னை எளிதில் தொடர்பு கொள்ளக் கூடியவராக இருக்க வேண்டும் என்கிற  மோடியின் உறுதியான சிந்தனையே அவரது உயர்வுக்குக் காரணம் என்பதை நூல் சான்றுகளுடன் விளக்குவது சிறப்பு.