தென்னிந்தியக் கிராம தெய்வங்கள்

தென்னிந்தியக் கிராம தெய்வங்கள் - ஹென்றி ஒயிட்ஹெட்  (தமிழில்: வானதி); பக்.160;  ரூ. 190;  கிழக்கு பதிப்பகம், சென்னை-14 ; ✆ 044- 4200 9603.

மதப் பரப்புரைக்காக இந்தியா வந்த பாதிரியார்களுக்கு இந்த நாட்டையும்  இந்து வழிபாட்டு முறைகளையும் புரிந்துகொள்வது தேவையாக இருந்தது. அதற்காக மேற்கத்திய ஆய்வு நெறிகளின் அடிப்படையில் கள ஆய்வுகளை மேற்கொண்டவர்களில் ஒருவர்தான் பிரிட்டனிலிருந்து வந்த ஹென்றி ஒயிட்ஹெட்.

ஆங்கிலிகன் திருச்சபையின் அருட்தந்தையாக 23 ஆண்டுகள் பணியாற்றிய இவர்,  ஆங்கிலேய ஆட்சியிலிருந்த மதராஸ் மாகாணத்தின் பல பகுதிகளில்  ஆய்வு செய்ததன் விளைவாக, 'தி வில்லேஜ் காட்ஸ் ஆஃப் சவுத் இந்தியா' என்ற ஆங்கில நூலை 1921-இல் எழுதி வெளியிட்டார். அந்த நூலின் தமிழ் மொழிபெயர்ப்பே இந்நூல்.

கிராம தெய்வங்களின் உருவாக்கம், வழிபாட்டு மரபுகள், சமய நம்பிக்கைகள், பலிச் சடங்குகள், நேர்த்திக்கடன்கள், திருவிழாக்கள், பாரம்பரியக் கலைகள் ஆகியவற்றை ஒரு புறப்பார்வையாளராக நோக்கி எழுதப்பட்டுள்ளது இந்த நூல்.

மதுரைவீரன், அழகர்கோவில் பதினெட்டாம்படி கருப்பசாமி, மாரியம்மன், கோவை கோனியம்மன், சவடம்மா, கன்னிகா பரமேஸ்வரி போன்ற தெய்வங்கள் குறித்த தகவல்கள் கவனிக்கத்தக்கன.  சமூகக்குழுக்களின் குலதெய்வ வழிபாடு, பெண் தெய்வங்களே குலதெய்வமாக இருப்பது குறித்தும் வியப்புடன் பதிவு செய்திருக்கிறார் நூலாசிரியர். ஓர் அந்நியரின் பார்வையில் விரியும் இந்த இன வரைவியல் நூல், சமூகவியல் ஆய்வாளர்களுக்கான ஆவணம்.