பரிணாமத்தின் ஊடாக வாழ்க்கையின் விளக்கம்

பரிணாமத்தின் ஊடாக வாழ்க்கையின் விளக்கம் - புரோசாந்தா சக்கரவர்த்தி (தமிழில்-பிஎஸ்வி குமாரசாமி); பக்.-236; ரூ.399;  மஞ்சுள் பப்ளிஷிங் ஹவுஸ், நொய்டா, உத்தரப் பிரதேசம்.

உயிரினங்களும், அதனூடே மனித இனமும் பரிணமித்த கதைகளை கூறும் நூல்களில் இந்நூல் பெரிதும் வேறுபட்டு பல அரிய ஆய்வுத் தகவல்களை தருகிறது. அமெரிக்க பல்கலைக்கழக பேராசிரியராகவும், ஆராய்ச்சியாளராகவும் பணியாற்றிய  நூலாசிரியர் முன்வைக்கும் கருத்துகள் அறிவியல்பூர்வமானதாகவும், அறுதித்தன்மை கொண்டதாகவும் உள்ளன.

குரங்கிலிருந்து மனிதன் உருவானதை விளக்கும் பரிணாம வளர்ச்சி குறித்த ஓவியமே அடிப்படையில் தவறு எனக் கூறும் நூலாசிரியர்,  உண்மையில் நாம் யார் என்பதை எளிமையாக உணர்த்துகிறார். 

குரங்குடன் சேர்ந்து நாமும் வளர்ச்சி அடைந்தோமே தவிர, அதிலிருந்து அப்படியே நாம் உருமாற்றம் அடையவில்லை என்பது இவரது கருத்தாக உள்ளது.

ஒரு பாக்டீரியா 70 ஆயிரம் தலைமுறைகள் கடந்து பரிணாமம் அடைந்தபோதும், அது வீரியமடைந்ததே அன்றி மற்றொரு உயிரினமாக உருவெடுக்கவில்லை என்ற உண்மை ஆராய்ச்சி தகவல் மூலம் எடுத்துரைக்கப்பட்டிருக்கிறது. அதுபோலவே கரோனா போன்ற வைரஸின் உருமாற்றமும் விறுவிறுப்பான நடையில் விளக்கப்பட்டிருக்கிறது.

எலும்பு மீனின் முதுகெலும்புக்கும், மனிதனின் முதுகெலும்புக்குமான தொடர்பு குறித்த விவரங்களும், பரிணாமத்தின்படி நிலை வளர்ச்சியை கேள்வி பதிலாக அளித்திருப்பதும் மீள்வாசிப்புக்கு தகுதியானவை.

டார்வினின் கதை சித்திரக் கதையாக சில பக்கங்களுக்கு கொடுக்கப்பட்டிருப்பது புதிய முயற்சி. விலங்குகளுக்கு இடையே தன்பாலின ஈர்ப்பு இருப்பது பொதுவான ஒன்று என்பதும், அதன் வாயிலாக பரிணமித்த மனித இனத்திலும் சிலருக்கு அத்தகைய பண்புகள் இருப்பது ஒத்தியல்பு என்பதும் அறியப்படாத தகவல்கள்.

அனைத்துத் தரப்பினரின் அறிவுத் தேடலுக்கும் விடை கொடுக்கிறது இந்நூல்.