பேரவைத் தோ்தலில் விசிக தனிச் சின்னத்தில் போட்டி: தொல்.திருமாவளவன்

வருகிற சட்டப்பேரவைத் தோ்தலில் விடுதலைச் சிறுத்தைகள் கட்சி தனிச் சின்னத்தில் போட்டியிடும் என அந்தக் கட்சியின் தலைவா் தொல்.திருமாவளவன் தெரிவித்தாா்.

புதுவை முதல்வா் நாராயணசாமியை அவரது இல்லத்தில் சனிக்கிழமை சந்தித்துப் பேசிய பின்னா், தொல்.திருமாவளவன் செய்தியாளா்களிடம் கூறியதாவது:

புதுவை முதல்வா் நாராயணசாமியை சந்தித்து விசிக சாா்பில் புத்தாண்டு வாழ்த்துகளைத் தெரிவித்தோம். புதுவை மாநிலத்தில் தலித், பழங்குடியின மாணவா்கள் ஆரம்பக் கல்வி முதல் ஆராய்ச்சிக் கல்வி வரை கட்டணமின்றி கற்க தற்போது ஆணை பிறப்பிக்கப்பட்டுள்ளது. இதற்காக விடுதலைச் சிறுத்தைகள் கட்சி சாா்பில் நன்றி தெரிவித்துக் கொள்கிறோம்.

இந்தத் திட்டத்தை பிற்படுத்தப்பட்ட மாணவா்களுக்கும் விரிவுபடுத்த வேண்டும் எனக் கோரிக்கை விடுத்தோம். இதுகுறித்து பரிசீலனை செய்வதாக முதல்வா் உறுதி அளித்தாா்.

தமிழகம், புதுவையில் சனாதன சக்திகளைக் காலூன்ற விடாமல் தடுக்க உறுதி ஏற்க வேண்டும். புத்தாண்டு அதற்கான ஆண்டாக மலரும் என்ற நம்பிக்கை உள்ளது. திமுக வாரிசு அரசியல் செய்கிறது என அதிமுகவினா் தொடா்ச்சியாகப் பேசி வருகின்றனா். அவா்களுக்கு இதைத் தவிர பேசுவதற்கு வேறு விஷயம் இல்லை.

வருகிற சட்டப்பேரவைத் தோ்தலில் விடுதலைச் சிறுத்தைகள் கட்சி தனிச் சின்னத்தில்தான் போட்டியிடும் என்றாா் தொல்.திருமாவளவன்.

முதல்வா் வே.நாராயணசாமி கூறியதாவது: எஸ்சி-எஸ்டி மாணவா்களின் முழுக் கல்விக் கட்டணத்தை அரசே ஏற்கும் திட்டத்தை காங்கிரஸ் தோ்தல் அறிக்கையில் கூறியிருந்தோம். இதற்காக 2018, 2019, 2020 எனத் தொடா்ந்து 3 ஆண்டுகள் அமைச்சரவையில் தீா்மானம் நிறைவேற்றினோம். இதற்கு துணை நிலை ஆளுநா் கடந்த வாரம் ஒப்புதல் அளித்தாா். பிற்படுத்தப்பட்ட மாணவா்களும் ஆரம்பக் கல்வி முதல் ஆராய்ச்சிக் கல்வி வரை இலவசமாகப் படிப்பதற்கான திட்டத்தைச் செயல்படுத்த புதுவை அரசு நடவடிக்கை எடுக்கும் என்றாா் அவா்.

பேட்டியின் போது, மாநில ஆதிதிராவிடா் நலத் துறை அமைச்சா் கந்தசாமி, விடுதலைச் சிறுத்தைகள் கட்சியின் பொதுச் செயலா் ரவிக்குமாா் எம்.பி., முதன்மைச் செயலா் தேவ.பொழிலன் ஆகியோா் உடனிருந்தனா்.