அருணாசலேஸ்வரர் கோயிலில் 5 அணையா தீபங்கள் ஏற்ற ஏற்பாடு

திருவண்ணாமலை ஸ்ரீஅருணாசலேஸ்வரர் கோயிலில் 5 இடங்களில் அணையா தீபங்கள் வைக்க ஏற்பாடு செய்யப்பட்டு வருவதாக கோயில் இணை ஆணையர் ஞானசேகர் தெரிவித்தார்.
இதுகுறித்து அவர் செய்தியாளர்களுக்கு வியாழக்கிழமை அளித்த பேட்டி: அருணாசலேஸ்வரர் கோயிலுக்கு வரும் பக்தர்களின் எண்ணிக்கை நாளுக்கு நாள் அதிகரித்துக்கொண்டு வருகிறது. எனவே, பக்தர்களுக்குத் தேவையான பாதுகாப்பு, அடிப்படை வசதிகள் செய்யப்பட்டு வருகின்றன.
கோயிலில் பக்தர்கள் அதிகம் கூடும் 5 இடங்களில் பெரிய அளவிலான விளக்கு (அணையா தீபம்) வைக்க முடிவு செய்யப்பட்டு, ஏற்பாடுகள் நடைபெற்று வருகின்றன. கோயிலின் 6 இடங்களில் நீர் தும்பிகள் (தீ விபத்து காலங்களில் நீர் வெளியேற்றும் குழாய்) வைக்கப்பட்டுள்ளன.
கோயிலின் சில இடங்களில் வெளிப்புறமாகச் செல்லும் மின் வயர்களால் விபத்துகள் ஏற்பட வாய்ப்புள்ளன. 
இதைத் தடுக்க கோயிலில் தரைவழியே மின் வயர்களை கொண்டு செல்ல நடவடிக்கை எடுக்கப்பட்டுள்ளது. இந்தத் திட்டத்தை நிறைவேற்ற ரூ.44 லட்சம் மதிப்பில் திட்ட அறிக்கை தயாரிக்கப்பட்டு இந்து சமய அறநிலையத் துறை ஆணையருக்கு அனுப்பப்பட்டுள்ளது என்றார்.