ராகவேந்திரர் பிருந்தாவனத்தில் ஆனி மாத பௌர்ணமி பூஜை

கருங்குழி ராகவேந்திரர் பிருந்தாவனத்தில் ஆனி மாத பௌர்ணமியை முன்னிட்டு, பௌர்ணமி பூஜை, சத்தியநாராயண பூஜை ஆகியவை வியாழக்கிழமை நடைபெற்றன.
கருங்குழி ஸ்ரீராகவேந்திரர் பிருந்தாவனத்தில் தமிழ் மாதந்தோறும் பௌர்ணமி பூஜை நடைபெறுவது வழக்கம். ஆனிமாத பௌர்ணமியை முன்னிட்டு பிருந்தாவனம் முழுவதும் வியாழக்கிழமை மின்விளக்குகளால் அலங்கரிக்கப்பட்டு இருந்தது. அதிகாலை மங்கல இசையுடன் விழா நிகழ்ச்சிகள் தொடங்கின. 
ராகவேந்திரர், ஆஞ்சநேயர் உள்ளிட்ட அனைத்து சந்நிதிகளிலும் சிறப்பு அபிஷேக ஆராதனைகள் நடைபெற்றன. பிருந்தாவன வளாகத்தில் சிறப்பு மேடையில் ராகவேந்திரர், சத்தியநாராயணர், ஆஞ்சநேயர் உள்ளிட்ட உற்சவ சிலைகள் சிறப்பு அலங்காரம் செய்யப்பட்டிருந்தது. நண்பகல் 12 மணிக்கு மேளதாளம் முழங்க, பஜனை கோஷ்டி பாடல்களை பாடிவர, தவ யோகவத்தில் இருந்து வரும் பிருந்தாவன பீடாதிபதி ரகோத்தம்ம சுவாமி ஊர்வலமாக அழைத்து வரப்பட்டார். அங்கு சத்தியநாராயண பூஜையை அவர் நடத்தினார். இந்நிகழ்வில் நூற்றுக்கும் மேற்பட்ட பக்தர்கள் கலந்துகொண்டனர். 
அவர்கள் அனைவருக்கும் அன்னதானம் செய்யப்பட்டது. நிகழ்ச்சிக்கான ஏற்பாடுகளை ராகவேந்திரர் பிருந்தாவன அறக்கட்டளை முதன்மை அறங்காவலர் ஏழுமலைதாசன் தலைமையில் விழாக்குழுவினர் செய்திருந்தனர்.