நெல்லையப்பர் வெள்ளி ரிஷப வாகனத்தில் வீதியுலா!

நெல்லை நெல்லையப்பர் கோயில் ஆனித் திருவிழா நான்காம் திருநாள் - 63 நாயன்மார்களுடன் சுவாமி நெல்லையப்பர் காந்திமதி அம்பாள் வெள்ளி ரிஷப வாகனத்தில் எழுந்தருளி வீதி உலா நடைபெற்றது. இதில் ஆயிரக்கணக்கான பக்தர்கள் கலந்துகொண்டு சுவாமி தரிசனம் செய்தனர்.

தமிழகத்தில் பிரசித்தி பெற்ற சிவாலயங்களில் ஒன்றான நெல்லை நெல்லையப்பர் திருக்கோயில் ஆணி பெருந்திருவிழா கடந்த 20ஆம் தேதி கொடியேற்றத்துடன் தொடங்கியது. 10 நாள்கள் நடைபெறும் திருவிழாவின் நான்காம் திருநாளான இன்று சுவாமி நெல்லையப்பர் காந்திமதி அம்பாள் பஞ்சமூர்த்திகளுடன் 4ம் திருநாள் மண்டகப்படிக்கு எழுந்தருளிச் சிறப்பு அபிஷேக ஆராதனைகள் காலையில் நடைபெற்றது.

தொடர்ந்து மாலையில் வெள்ளி ரிஷப வாகனத்தில் சுவாமி நெல்லையப்பர் காந்திமதி அம்பாள் சிறப்பு அலங்காரத்தில் எழுந்தருளி பக்தர்களுக்குக் காட்சியளித்தனர். வீணை மீட்டிய திருக்கோலத்தில் வெண்பட்டு உடுத்திச் சிறப்பு அலங்காரத்தில் எழுந்தருளிய காந்திமதி அம்பாள் சுவாமி நெல்லையப்பருக்குச் சிறப்பு அர்ச்சனை உள்ளிட்டவைகள் நடைபெற்றது. தொடர்ந்து சுவாடச உபச்சார மகா தீபாராதனை நடைபெற்றது. பின்னர், யாகசாலை பூஜைகளும் குடவரை வாயில் தீபாராதனையும் நடைபெற்று பஞ்ச மூர்த்திகளுடன் பஞ்ச வாத்தியம் இசைக்கச் சுவாமி நெல்லையப்பர் காந்திமதி அம்பாள் வெள்ளி ரிஷப வாகனத்தில் எழுந்தருளி திருவீதி உலா நடைபெற்றது.

முன்னதாக, 63 நாயன்மார்கள் பஞ்சவர்ணம் கேடயத்தில் சிறப்பு அலங்காரத்தில் எழுந்தருளி திருவீதி உலா சென்று பக்தர்களுக்கு அருள்பாலித்தனர் இந்த நிகழ்ச்சியில், ஆயிரக்கணக்கான பக்தர்கள் கலந்துகொண்டு சுவாமி தரிசனம் செய்தனர்.

On the fourth day of the Aani festival at the Nellai Nellaiyappar Temple, Lord Nellaiyappar and Goddess Gandhimathi Ambal, accompanied by the 63 Nayanmars, ascended the silver Rishaba Vahanam (bull mount) and proceeded in a street procession.