முத்தரப்புப் போட்டி: ஆஸ்திரேலியா ஏ அணி அபார வெற்றி!

சென்னை சேப்பாக்கம் மைதானத்தில் நடைபெற்று வரும் முத்தரப்பு ஒரு நாள் கிரிக்கெட் தொடரில் இன்று இந்திய - ஆஸ்திரேலிய ஏ அணிகள் மோதின. இதில் ஆஸ்திரேலியா ஏ அணி, 119 ரன்கள் வித்தியாசத்தில் அமர்க்களமாக வெற்றி பெற்றது.

இந்தியா, ஆஸ்திரேலியா, தென் ஆப்பிரிக்கா ஆகிய 3 நாடுகள் பங்கேற்றுள்ள "ஏ' அணிகளிடையிலான முத்தரப்பு ஒரு நாள் கிரிக்கெட் தொடர் சென்னையில் நடைபெற்று வருகிறது. 4 நாள் கொண்ட அதிகாரப்பூர்வமற்ற டெஸ்ட் போட்டியில் ஏற்கெனவே இந்திய ஏ அணியைத் தோற்கடித்த ஆஸ்திரேலிய ஏ அணி, முதல் ஒரு நாள் போட்டியில் தென் ஆப்பிரிக்க ஏ அணியையும் சாய்த்து அபாரமாக செயல்பட்டு வருகிறது.

டெஸ்ட் போட்டியில் தோல்வியைத் தழுவினாலும் ஒரு நாள் தொடரில் ஆதிக்கத்தை நிலைநாட்டும் முனைப்பில் ராகுல் திராவிட்டிடம் பயிற்சி எடுத்துவரும் இந்திய ஏ அணி உள்ளது. எனவே இந்தப் போட்டி மிகவும் விறுவிறுப்பாக இருக்கும் என எதிர்பார்க்கப்பட்டது. ஆனால், போட்டி ஆரம்பித்தது முதல் ஆஸ்திரேலியா ஏ அணியே ஆதிக்கம் செலுத்தியது.

டாஸ் வென்ற ஆஸ்திரேலியா ஏ அணி, பேட்டிங்கைத் தேர்ந்தெடுத்தது.

தொடக்க ஆட்டக்காரர்களான களமிறங்கிய உஸ்மான் கவாஜாவும் பர்ன்ஸும் அதிரடியாக ஆடினார்கள். இருவரும் சதம் அடித்தார்கள். 36-வது ஓவரின்போதுதான் இந்தக் கூட்டணியைப் பிரிக்கமுடிந்தது. கவாஜா 100, பர்ன்ஸ், 154 ரன்கள் எடுத்தார்கள். நிர்ணயிக்கப்பட்ட 50 ஓவர்களில் 4 விக்கெட்களை இழந்து 334 ரன்களைக் குவித்தது ஆஸ்திரேலியா ஏ அணி.

கடினமான இலக்குடன் களமிறங்கிய இந்திய பேட்ஸ்மேன்களா, ஆஸ்திரேலிய அணியின் பந்துவீச்சை சமாளிக்கமுடியாமல் திணறினார்கள். 42.3 ஓவர்களில் 215 ரன்கள் எடுத்து ஆல் அவுட் ஆனது. இதனால் ஆஸ்திரேலியா ஏ அணி 119 ரன்கள் வித்தியாசத்தில் அபார வெற்றி பெற்றது.