பந்துவீச்சு பரிசோதனை: சென்னை வந்தார் தரிந்து கௌஷல்

இலங்கை கிரிக்கெட் அணியின் சுழற் பந்துவீச்சாளர் தரிந்து கௌஷல் பந்துவீச்சு பரிசோதனைக்காக திங்கள்கிழமை சென்னை வந்தார்.
 அண்மையில் முடிவடைந்த இந்தியாவுக்கு எதிரான 3-ஆவது டெஸ்ட் கிரிக்கெட் போட்டியில் இலங்கை சுழற் பந்துவீச்சாளர் தரிந்து கௌஷலின் பந்துவீச்சு சந்தேகமளிப்பதாக போட்டி நடுவர்கள் சர்வதேச கிரிக்கெட் கவுன்சிலிடம் (ஐசிசி) இந்த மாத தொடக்கத்தில் புகார் அளித்தனர்.
 இதனால் அவர், தனது பந்துவீச்சு சரியானது தான் என்பதை 14 நாள்களுக்குள் நிரூபிக்க வேண்டிய கட்டாயத்துக்கு ஆளானார். இந்நிலையில், கௌஷல், திங்கள்கிழமை சென்னை போரூரில் உள்ள ஐசிசியின் அங்கீகரிக்கப்பட்ட பந்துவீச்சு பரிசோதனை மையத்துக்கு வந்து தனது தனது பந்துவீச்சை ஆய்வுக்கு உட்படுத்தினார்.
 இந்த பரிசோதனை 2 மணி நேரம் நடந்தது. பின்னர், அங்கிருந்து புறப்பட்ட அவர் விமானம் மூலம் இலங்கை திரும்பினார். இரண்டு வார காலத்துக்குள் பரிசோதனை முடிவுகள் ஐசிசிக்கும், இலங்கை கிரிக்கெட் வாரியத்துக்கும் அனுப்பி வைக்கப்படும்.