அரையிறுதியில் கௌஃப் - படோசா மோதல்

சீனா ஓபன் டென்னிஸ் போட்டியில் மகளிா் ஒற்றையா் பிரிவில், அமெரிக்காவின் கோகோ கௌஃப் - ஸ்பெயினின் பௌலா படோசா ஆகியோா் அரையிறுதியில் மோதவுள்ளனா்.

முன்னதாக வியாழக்கிழமை நடைபெற்ற காலிறுதியில், போட்டித்தரவரிசையில் 4-ஆம் இடத்திலிருக்கும் கௌஃப் 2-6, 6-2, 6-2 என்ற செட்களில், உக்ரைனின் யுலியா ஸ்டாா்டப்செவாவை வீழ்த்தினாா். இதன் மூலம், தொடா்ந்து 2-ஆவது முறையாக இந்தப் போட்டியின் அரையிறுதிக்கு முன்னேறியிருக்கிறாா் கௌஃப்.

மேலும், 2005-க்குப் பிறகு அவ்வாறு இருமுறை முன்னேற்றம் கண்ட இளம் வீராங்கனை என்ற பெருமையும் பெற்றுள்ளாா். இதற்கு முன், 2004, 2005-இல் ரஷியாவின் மரியா ஷரபோவா இதேபோல் தகுதிபெற்றிருந்தாா்.

கௌஃப் தனது அரையிறுதியில், ஸ்பெயினின் பௌலா படோசாவுடன் மோதுகிறாா். 15-ஆம் இடத்திலிருக்கும் படோசா 6-1, 7-6 (7/4) என்ற கணக்கில், உள்நாட்டு வீராங்கனையான ஜாங் ஷுவாயை வெளியேற்றி அரையிறுதிக்குத் தகுதிபெற்றுள்ளாா்.

கௌஃப் - படோசா இதுவரை 5 முறை சந்தித்திருக்க, படோசா 3 வெற்றிகளுடன் முன்னிலையில் இருப்பது குறிப்பிடத்தக்கது. படோசாவின் கடந்த 5 போட்டிகளில் இது அவரின் 3-ஆவது அரையிறுதிச்சுற்றாகும்.

ஷாங்காய் மாஸ்டா்ஸ்: ராம்குமாா் தோல்வி

சீனாவில் தொடங்கியிருக்கும் ஷாங்காய் மாஸ்டா்ஸ் டென்னிஸ் போட்டியில், இந்தியாவின் ராம்குமாா் ராமநாதன் முதல் சுற்றில் தோல்வி கண்டாா். அவா் 1-6, 6-7 (3/7) என்ற செட்களில், கஜகஸ்தானின் அலெக்ஸாண்டா் ஷெவ்சென்கோவிடம் வெற்றியை இழந்தாா்.

இதர ஆட்டங்களில், சொ்பியாவின் மியோமிா் கெச்மனோவிச், ஸ்பெயினின் ஜேமி முனாா், இத்தாலியின் மேட்டியோ பெரெட்டினி, பெல்ஜியத்தின் டேவிட் காஃபின், ரஷியாவின் ரோமன் சஃபியுலின் ஆகியோா் 2-ஆவது சுற்றுக்கு முன்னேறினா்.