ரஞ்சி கோப்பையில் விராட் கோலி விளையாடுகிறாரா?

இந்திய அணியின் நட்சத்திர வீரர்களில் ஒருவரான விராட் கோலி ரஞ்சி கோப்பையில் தில்லி அணியில் இடம்பெற்றுள்ளார்.

இந்தியா மற்றும் ஆஸ்திரேலிய அணிகளுக்கு இடையிலான பார்டர் - கவாஸ்கர் டெஸ்ட் தொடர் அண்மையில் நிறைவடைந்தது. இந்தத் தொடரில் இந்திய அணியின் டாப் ஆர்டர் பேட்ஸ்மேன்கள் மோசமான ஆட்டத்தை வெளிப்படுத்தினர். குறிப்பாக, ரோஹித் சர்மா மற்றும் விராட் கோலி இருவரும் சிறப்பாக செயல்படத் தவறினர்.

இதையும் படிக்க: சாம்பியன்ஸ் டிராபி தொடருக்கான பயிற்சியில் ரோஹித் சர்மா!

ஆஸ்திரேலியாவுக்கு எதிரான தொடரில் மோசமான ஆட்டத்தை வெளிப்படுத்தியதால், இந்திய அணியின் முன்னாள் வீரர்கள் பலரும் ரோஹித் சர்மா மற்றும் விராட் கோலியை கடுமையாக விமர்சித்தனர். ஃபார்மில் இல்லாத வீரர்கள் உள்ளூர் போட்டிகளில் விளையாட வேண்டும் எனவும் தெரிவித்தனர்.

ரஞ்சி கோப்பையில் விளையாடுகிறாரா?

ரஞ்சி கோப்பையில் சௌராஷ்டிரத்துக்கு எதிரான போட்டியில் தில்லி அணி விளையாடவுள்ளது. இந்தப் போட்டிக்கான 22 பேர் கொண்ட உத்தேச அணியை தில்லி அணி நிர்வாகம் வெளியிட்டுள்ளது. அதில் நட்சத்திர வீரரான விராட் கோலியின் பெயரும் இடம்பெற்றுள்ளது.

இதன் மூலம், ரஞ்சி கோப்பை கிரிக்கெட் தொடரில் விராட் கோலி விளையாடுவாரா என்ற எதிர்பார்ப்பு ரசிகர்கள் மத்தியில் எழுந்துள்ளது. இருப்பினும், ரஞ்சி கோப்பையில் விராட் கோலி விளையாடுகிறாரா? இல்லையா? என்பது இன்னும் உறுதியாகத் தெரியவில்லை.

இதையும் படிக்க: இந்திய அணிக்காக விளையாடும் எண்ணம் இன்னும் இருக்கிறது: கருண் நாயர்

ஆஸ்திரேலியாவுக்கு எதிராக சிட்னியில் நடைபெற்ற கடைசி டெஸ்ட் போட்டியின்போது, விராட் கோலிக்கு கழுத்துப் பகுதியில் வலி ஏற்பட்டதாகவும், அதற்கான சிகிச்சையில் அவர் இருப்பதாகவும் கூறப்படுகிறது. மேலும், ரஞ்சி கோப்பையில் விளையாடுவது சந்தேகம் என விராட் கோலி தரப்பிலிருந்து தெரிவித்ததாகவும் கூறப்படுகிறது.

விராட் கோலி கடைசியாக கடந்த 2012 ஆம் ஆண்டு உத்தர பிரதேசத்துக்கு எதிரான ரஞ்சி போட்டியில் விளையாடியிருந்தது குறிப்பிடத்தக்கது.