இறுதிவரை அசராமல் போராடிய தோனி: ரசிகர்களால் மறக்க முடியாத ஆட்டத்தின் விடியோ!

நேற்றைய ஐபிஎல் ஆட்டத்தில் சென்னை சூப்பர் கிங்ஸ் அணியை 4 ரன்கள் வித்தியாசத்தில் பஞ்சாப் அணி வென்றது. 

பஞ்சாப் கிங்ஸ் லெவன் மற்றும் சென்னை சூப்பர் கிங்ஸ் அணிகள் இடையே ஆன ஐபிஎல் 12-வது ஆட்டம் ஞாயிற்றுக்கிழமை மொஹாலியில் நடைபெற்றது. முன்னதாக டாஸ் வென்ற சென்னை அணியின் கேப்டன் தோனி பீல்டிங்கை தேர்வு செய்தார். அதைத் தொடர்ந்து பஞ்சாப் அணி 20 ஓவர்களில் 7 விக்கெட்டுகளை இழந்து 197 ரன்களை எடுத்தது. அதைத் தொடர்ந்து சென்னை அணியால் 20 ஓவர்கள் முடிவில் 5 விக்கெட் இழப்புக்கு சென்னை அணி 193 ரன்களை மட்டுமே குவிக்க முடிந்தது. கடைசி ஓவரில் 11 ரன்கள் வெற்றிக்கு தேவை என்ற நிலையில் பஞ்சாப்பின் மொகித் சர்மா திறமையாக பந்து வீசி ரன்குவிப்பை கட்டுப்படுத்தினார். எனினும் கடைசி பந்தில் தோனி இமாலய சிக்ஸரை அடித்தார். 5 சிக்ஸர், 6 பவுண்டரியுடன் 44 பந்துகளில் தோனி 79 ரன்களைக் குவித்தும் சென்னை அணியால் வெற்றி பெற முடியவில்லை. எனினும் அவருடைய அதிரடி ஆட்டம், ரசிகர்களுக்கு விருந்தாக அமைந்தது. கடைசி வரை போராடிய அவருடைய முயற்சிக்கு எல்லாத் தரப்புகளிலுமிருந்தும் பாராட்டுகள் குவிகின்றன. 

கடுமையாக முயற்சி செய்து தோல்வியடைந்ததால் சென்னை ரசிகர்களுக்கு இந்தத் தோல்வி வருத்தத்தை அளிக்கவில்லை. தோனியின் முயற்சிக்குப் பலன் கிடைக்கவில்லையே என்கிற ஆதங்கம்தான் அனைவருக்கும் ஏற்பட்டது.