விம்பிள்டன்: அதிக வெற்றிகள் பெற்று ரோஜர் ஃபெடரர் புது சாதனை

விம்பிள்டன் டென்னிஸ் தொடரில் அதிக வெற்றிகளைப் பெற்று புது சாதனைகளைப் படைத்த முன்னணி வீரர் ரோஜர் ஃபெடரர், 4-ஆவது சுற்றுக்கு வெள்ளிக்கிழமை முன்னேறினார்.

டென்னிஸ் விளையாட்டின் மிகவும் புகழ்பெற்ற விம்பிள்டன் தொடர் நடைபெற்று வருகிறது. இதில் ஸ்விட்சர்லாந்தைச் சேர்ந்த முன்னணி டென்னிஸ் வீரர் ரோஜர் ஃபெடரர், ஜெர்மனியைச் சேர்ந்த ஜான்-லென்னார்ட் ஸ்டரஃப் உடன் வெள்ளிக்கிழமை நடைபெற்ற 3-ஆவது சுற்று ஆட்டத்தில் மோதினார்.

இதில் ஒரு மணிநேரம் 34 நிமிடத்தில் நடைபெற்ற இந்த ஆட்டத்தில் ஆரம்பம் முதலே ஆதிக்கம் செலுத்திய ஃபெடரர்,  6-3, 7-5, 6-2 என்ற செட் கணக்கில் ஸ்டாரஃப்-ஐ எளிதாக வீழ்த்தி, 4-ஆவது சுற்றுக்கு முன்னேறினார். வரலாற்றுச் சிறப்புமிக்க 9-ஆவது விம்பிள்டன் கோப்பையை வெல்லும் எண்ணத்துடன் களமிறங்கியுள்ள ஃபெடரர், பிரான்ஸ் வீரர் ஆட்ரியன் மேன்னேரினோ உடன் 4-ஆவது சுற்று ஆட்டத்தில் பலப்பரீட்சை நடத்தவுள்ளார்.

மேலும் இப்போட்டியில் ரோஜர் ஃபெடரர், சில சாதனைகளையும் படைத்துள்ளார். அதன் விவரம் பின்வருமாறு:

• கடந்த விம்பிள்டன் தொடர் முதல் இதுவரை 29 செட்களை தொடர்ச்சியாக கைப்பற்றியுள்ளார்.

• விம்பிள்டன் ஆடவர் ஒற்றையர் ஆட்டத்தில் தொடர்ச்சியாக அதிக புள்ளிகள் (35 புள்ளிகள்) பெற்று விம்பிள்டன் சாதனையை சமன் செய்துள்ளார்.

• கிராஸ் கோர்ட் எனப்படும் புல்தரை மீதான டென்னிஸ் போட்டிகளில் அதிக வெற்றிபெற்றவர்களில் ஜிம்மி கானர்ஸ்-ஐ கடந்து 175 வெற்றிகளுடன் ரோஜர் ஃபெடரர் முதலிடம் பிடித்தார்.