தோல்வியே இல்லாத வருடம்: சென்னை டெஸ்ட்டின் முக்கிய அம்சங்கள்!

இங்கிலாந்துக்கு எதிரான 5-வது டெஸ்ட் கிரிக்கெட் போட்டியில் இந்தியா, இன்னிங்ஸ் மற்றும் 75 ரன்கள் வித்தியாசத்தில் வெற்றி கண்டது. இதன்மூலம் 5 போட்டிகள் கொண்ட இந்தத் தொடரில் இந்தியா 4-0 என்ற கணக்கில் தொடரையும் கைப்பற்றியுள்ளது. 2012-ல் இங்கிலாந்திடம் கண்ட படுதோல்விக்கும் பதிலடி கொடுத்துள்ளது இந்தியா. இந்த டெஸ்டின் முக்கிய புள்ளிவிவரங்கள்:

* முதல் இன்னிங்ஸில் அதிக ரன்கள் எடுத்து இன்னிங்ஸ் தோல்வி கண்ட அணிகளில் இங்கிலாந்து அணி முதலிடம் பிடித்துள்ளது. இந்த டெஸ்ட் போட்டியில் 477 ரன்கள் எடுத்தபின்பும் அந்த அணி இன்னிங்ஸ் தோல்வி கண்டது. 

477 இங்கிலாந்து - இந்தியா, 2016 

432 இங்கிலாந்து - ஆஸ்திரேலியா, 2001 

407 பாகிஸ்தான் - இந்தியா, 2004

* இந்த வருடம் இந்திய அணி ஒரு டெஸ்ட் போட்டியிலும் தோற்கவில்லை. 9 டெஸ்டுகளில் வென்றுள்ளது. ஒரு தோல்வியும் பெறாமல் ஒருவருடம் அதிக டெஸ்ட் வெற்றிகள் கண்ட அணி இங்கிலாந்து. 2004-ம் வருடம் ஒரு தோல்வியுமின்றி 11 வெற்றிகள் பெற்றது. அதேபோல ஆஸ்திரேலிய அணி 2006ம் வருடம் 10 வெற்றிகளைப் பெற்றது. 9 டெஸ்ட் வெற்றிகளுடன் இந்திய அணி மூன்றாம் இடத்தில் உள்ளது.

* இந்திய அணி இதுவரை 18 டெஸ்ட் போட்டிகளில் தோல்வி அடையாமல் உள்ளது. இதற்கு முன்பு, செப்டம்பர் 1985 - மார்ச் 1987 காலகட்டத்தில் தோல்வியின்றி 17 டெஸ்ட் போட்டிகள் விளையாடியதே சாதனையாக இருந்தது. அதை கோலி அணி முறியடித்துள்ளது. செப்டம்பர் 1985 - மார்ச் 1987 காலகட்டத்தில் இந்திய அணி 4 டெஸ்டுகளில் மட்டுமே வெற்றிபெற்றது. ஆனால் கோலி அணி இந்த 18 டெஸ்டுகளில் 14 வெற்றிகளைப் பெற்றுள்ளது.

* 4-0 என டெஸ்ட் தொடரை வென்றுள்ளது இந்தியா. இதற்கு முன்பு முதல்தடவையாக 4-0 என ஆஸ்திரேலியாவுக்கு எதிராக 2012-13-ல் வென்றது. அதற்குப் பிறகு இப்போதுதான் மீண்டும் 4-0 என வென்றுள்ளது இந்திய அணி. 

* இதுவரை ஜடேஜா எடுத்த 106 விக்கெட்டுகளில் 16.03% விக்கெட்டுகள் எதிரணி கேப்டனின் விக்கெட்டுகளாகும். 

* இந்த டெஸ்ட் தொடரில் 655 ரன்கள் பெற்று தொடர் நாயகன் விருதைப் பெற்றுள்ளார் கோலி.

* முதல் 22 டெஸ்டுகளில் அதிக வெற்றிகள் பெற்ற கேப்டன்களில் மூன்றாம் இடத்தில் உள்ளார் கோலி. 17 - ஸ்டீவ் வாஹ், 15 - பாண்டிங், 14 - கோலி (மற்றும் 3 பேர்)

* இங்கிலாந்து இன்று: 
104/0 - 39.3 ஓவர்கள் 
103/10 - 48.3 ஓவர்கள்