போல்ட் 7 விக்கெட்டுகள்! 121 ரன்களுக்குச் சுருண்டு ஒருநாள் தொடரை இழந்த மேற்கிந்தியத் தீவுகள் அணி!

மேற்கிந்தியத் தீவுகளுக்கு எதிரான 2-வது ஒருநாள் போட்டியை நியூஸிலாந்து அணி 204 ரன்கள் வித்தியாசத்தில் வென்றுள்ளது. 

கிறிஸ்ட்சர்ச்சில் நடைபெற்ற இந்தப் போட்டியில் டாஸ் வென்ற மேற்கிந்தியத் தீவுகள் அணி, பந்துவீச்சைத் தேர்வு செய்தது. 

முதல் ஒருநாள் போட்டியை வென்ற நியூஸிலாந்து அணி மிகுந்த நம்பிக்கையுடன் களமிறங்கியது. நிர்ணயிக்கப்பட்ட 50 ஓவர்களில் 6 விக்கெட் இழப்புக்கு 325 ரன்கள் குவித்தது. வொர்க்கர் (58 ரன்கள்)), டெய்லர் (57 ரன்கள்), நிகோலஸ் (83 ரன்கள்) ஆகியோர் அரை சதமெடுத்தார்கள். நிகோலஸ் 62 பந்துகளில் 83 ரன்கள் எடுத்து அதிரடி ஆட்டத்தை வெளிப்படுத்தினார். ஆஸ்ட்லே 49 ரன்கள் எடுத்து கடைசிக்கட்டத்தில் அணிக்கு மிகவும் உதவினார். மே.இ. அணி தரப்பில் காட்ரெல் 3 விக்கெட்டுகளை வீழ்த்தினார். 

கடினமான இலக்கை எதிர்கொள்ளமுடியாமல் மே.இ. அணி 28 ஓவர்களில் 121 ரன்களுக்குச் சுருண்டது. அந்த அணியில் நர்ஸ் அதிகபட்சமாக 27 ரன்கள் எடுத்தார். நியூஸிலாந்தின் போல்ட் அசத்தலாகப் பந்துவீசி 7 விக்கெட்டுகளை வீழ்த்தி ஆட்ட நாயகன் விருதைத் தட்டிச்சென்றார். 

இதையடுத்து 3 ஒருநாள் போட்டிகள் கொண்ட தொடரை வென்றுள்ள நியூஸிலாந்து, 2-0 என முன்னிலை வகிக்கிறது. டிசம்பர் 26 அன்று, இதே மைதானத்தில் கடைசி ஒருநாள் போட்டி நடைபெறவுள்ளது.