அஸ்லான் ஷா கோப்பை: இந்தியாவை வீழ்த்தியது ஆஸ்திரேலியா

அஸ்லான் ஷா கோப்பை ஹாக்கிப் போட்டியில் இன்று நடைபெற்ற ஆட்டத்தில் இந்தியாவை நடப்பு சாம்பியன் ஆஸ்திரேலிய அணி வீழ்த்தியுள்ளது.  

மலேசியாவின் ஈபோ நகரில் நடைபெற்று வரும் இந்தப் போட்டியில் ஆஸ்திரேலியாவை எதிர்கொண்டது இந்திய அணி. தனது முந்தைய ஆட்டத்தில் 6-1 என்ற கோல் கணக்கில் மலேசியாவை தோற்கடித்த உற்சாகத்தில் களமிறங்கியது ஆஸ்திரேலியா. 

26-வது நிமிடத்தில் இந்தியாவின் ஹர்மன்ப்ரீத் கோல் கோல் அடித்து முன்னிலை ஏற்படுத்திக்கொடுத்தார். ஆனால் உடனே ஆஸ்திரேலியா பதில் கோல் அடித்து சமன் செய்தது. ஆட்டத்தின் முதல் பாதியில் இரு அணிகளும் 1-1 என்று சமமாக இருந்தன.

இந்த ஆட்டத்தில் 13-வது நிமிடத்தில் இந்திய கோல் கீப்பர் ஸ்ரீஜேஸுக்குக் காயம் ஏற்பட்டது. இதனால் அவர் ஆட்டத்திலிருந்து வெளியேற நேர்ந்தது. இது இந்திய அணிக்குப் பின்னடைவாக ஆனது.

மூன்றாவது காலிறுதியில் ஒரு கோல் அடித்து 2-1 என முன்னிலை பெற்றது ஆஸ்திரேலியா. அடுத்தக் காலிறுதியில் மற்றொரு கோல் அடித்து இறுதியில் 3-1 என்கிற கோல் கணக்கில் அபார வெற்றி கண்டது ஆஸ்திரேலியா.