அதிக பந்துகளை வீசி ஆண்டர்சன் புது சாதனை!

நியூஸிலாந்து சுற்றுப்பயணம் செய்த இங்கிலாந்து அணி 2 போட்டிகள் கொண்ட டெஸ்ட் தொடரில் பங்கேற்று விளையாடியது. இதில் ஆக்லாந்தின் ஈடன் பார்க் மைதானத்தில் மார்ச் 22 முதல் மார்ச் 26 வரை நடைபெற்ற முதல் டெஸ்ட் போட்டியில் நியூஸிலாந்து அணி இன்னிங்ஸ் மற்றும் 49 ரன்கள் வித்தியாசத்தில் அபார வெற்றிபெற்றது. 

பின்னர் 2-ஆவது டெஸ்ட் போட்டி மார்ச் 30 தொடங்கி ஏப்ரல் 3 வரை கிறைஸ்ட்சர்ச்சில் அமைந்துள்ள ஹாக்லி ஓவல் மைதானத்தில் நடைபெற்ற இந்த ஆட்டம் டிராவில் முடிந்தது. இதன்மூலம் 2 போட்டிகள் கொண்ட தொடரில் 1-0 என்ற கணக்கில் நியூஸிலாந்து கைப்பற்றியது.

இதில், இங்கிலாந்து அணியின் முன்னணி வேகப்பந்துவீச்சாளர் ஜேம்ஸ் ஆண்டர்சன், டெஸ்ட் கிரிக்கெட்டில் அதிக பந்துகள் வீசிய வேகப்பந்துவீச்சாளர் என்ற புதிய சாதனையைப் படைத்துள்ளார்.

2-ஆவது டெஸ்ட் போட்டியின் 17-ஆவது ஓவரின் போது அவர் இந்த மைல்கல்லை எட்டினார். இதன்மூலம் 30,019 பந்துகளை வீசியுள்ள மேற்கிந்திய தீவுகள் அணியின் ஜாம்பவான் கார்ட்னி வால்ஷின் சாதனையை முறியடித்து 30,020 பந்துகளை வீசி சாதனைப் படைத்தார். 

தற்போது உலகின் தலைசிறந்த சுழற்பந்துவீச்சாளர்களான ஷேன் வார்னே, அனில் கும்ப்ளே மற்றும் முத்தையா முரளிதரன் ஆகியோருக்கு அடுத்தபடியாக டெஸ்ட் போட்டியில் அதிக பந்துகளை வீசியுள்ள பந்துவீச்சாளர் என்ற பெருமையையும் பெற்றுள்ளார்.

முன்னதாக, 2015-ஆம் ஆண்டு டெஸ்ட் போட்டிகளில் 500 விக்கெட்டுகளை வீழ்த்திய முதல் இங்கிலாந்து பந்துவீச்சாளர் என்ற சாதனையை ஜேம்ஸ் ஆண்டர்சன் படைத்துள்ளது குறிப்பிடத்தக்கது. அவர் தற்போது வரை 531 விக்கெட்டுகளை வீழ்த்தியுள்ளார்.