90 மீ தூரம் எறிவதே இலக்கு: நீரஜ் சோப்ரா

ஒலிம்பிக் பதக்கத்தை வெல்லும் வகையில் 90 மீ தூரம் எறிவதே அடுத்த இலக்கு என காமன்வெல்த் போட்டி ஈட்டி எறிதலில் தங்கம் வென்ற நீரஜ் சோப்ரா தெரிவித்துள்ளார்.
ஹரியாணா மாநிலத்தைச் சேர்ந்த நீரஜ் சோப்ரா (20) கடந்த 201-ம் ஆண்டு உலக ஜூனியர் சாம்பியன்ஷிப் போட்டியில் ஈட்டி எறிதலில் தங்கம் வென்றதின் மூலம் அனைவரது கவனத்தையும் ஈர்த்தார். ஜெர்மனியில் பயிற்சி பெறும் நீரஜ் சோப்ரா கோல்ட்கோஸ்ட் காமன்வெல்த் போட்டியில் தடகளத்தில் தங்கம் வென்ற ஓரே வீரர் ஆவார். 86.47 மீ தூரம் ஈட்டி எறிந்து தங்கம் வென்றார்.
இந்நிலையில் புதன்கிழமை புதுதில்லி திரும்பிய சோப்ராவுக்கு இந்திய ராணுவம் சார்பில் உற்சாக வரவேற்பு அளிக்கப்பட்டது. அப்போது அவர் செய்தியாளர்களிடம் கூறியதாவது:
ஜெர்மனியில் மூன்று மாதங்களாக பயிற்சியாளர் வெர்னர் டேனியல்ஸிடம் பயிற்சி பெற்றேன். அங்கே நானே பயிற்சி எடுத்துக் கொண்டு, சுயமாக சமைத்து சாப்பிட்டேன். தங்கம் வெல்வதற்காக கடினமாக பயிற்சி பெற நேரிட்டது. எனது முக்கிய நோக்கம் 90 மீ தூரம் ஈட்டி எறிவதாகும். சர்வதேச அளவிலான இலக்கு அதுவாகும். அதை அடைந்தால் உலகளாவிய போட்டிகளில் பதக்கம் வெல்லலாம்.
அடுத்து வரும் ஆசிய விளையாட்டு, ஒலிம்பிக்ஸ் போன்றவற்றில் தீவிர கவனம் செலுத்துவேன். டயமண்ட் லீக் போட்டிகளிலும் பங்கேற்க உள்ளேன். பாட்டியாலாவில் பயிற்சி பெற உள்ளேன். ஆசிய அளவில் கத்தார், சீன தைபே, உள்ளிட்ட சில நாடுகளைச் சேர்ந்த வீரர்கள் ஈட்டி எறிதலில் சவாலாக இருப்பர் என்றார்.
ஜெர்மனியின் ஜோகன்னஸ் வெட்டர் (94.44), தாமஸ் ஆர்லர் (93.90) ஆகியோர் தலைசிறந்த ஈட்டி எறியும் வீரர்களாக உள்ளனர்.
நீரஜ் சோப்ராவின் பயிற்சியாளரான வெர்னர் தான் 104.80 மீ தூரம் ஈட்டி எறிந்த ஓரே வீரராக உள்ளார் என்பது குறிப்பிடத்தக்கது.