2018 உலகக் கோப்பை ஹாக்கி அட்டவணை வெளியீடு

2018 உலகக் கோப்பை ஹாக்கி தொடர் குறித்து சர்வதேச ஹாக்கி சம்மேளனம் புதன்கிழமை வெளியிட்ட அறிவிப்பில் தெரிவிக்கப்பட்டுள்ளதாவது:

2018-ம் ஆண்டு இந்தியாவில் நடைபெறவுள்ள உலகக் கோப்பை ஹாக்கி தொடர் மொத்தம் 19 நாட்கள் நடைபெறுகிறது. இதில் 16 அணிகள் பங்கேற்கின்றன. இவை மொத்தம் 4 பிரிவுகளாகப் பிரிக்கப்பட்டுள்ளன. 

• முதல் பிரிவு: அர்ஜென்டினா, நியூஸிலாந்து, ஸ்பெயின், ஃபிரான்ஸ்
• 2-ஆம் பிரிவு: ஆஸ்திரேலியா, இங்கிலாந்து, அயர்லாந்து, சீனா
• 3-ஆவது பிரிவு: பெல்ஜியம், இந்தியா, கனடா, தென் ஆப்பிரிக்கா
• 4-ஆவது பிரிவு: நெதர்லாந்து, ஜெர்மனி, மலேசியா, பாகிஸ்தான்

இதில் நவம்பர் 28-ந் தேதி தொடங்கும் லீக் சுற்றுப்போட்டிகளில் ஒவ்வொரு அணியும் தங்கள் பிரிவில் இடம்பெற்றுள்ள இதர அணிகளுடன் மோதுகின்றன. இதில் அனைத்து பிரிவிலும் முதலிடம் பிடிக்கும் அணிகள் நேரடியாக காலிறுதிப் போட்டிக்குத் தகுதி பெறும். 

2-ஆம் மற்றும் 3-ஆம் இடம்பிடிக்கும் அணிகளுக்கு இடையில் அடுத்த சுற்றுப்போட்டிகள் நடைபெற்று அவற்றில் வெல்லும் அணிகளும் டிசம்பர் 10 மற்றும் 11 ஆகிய தேதிகளில் நடைபெறும் 8 அணிகளுக்கு இடையிலான நாக்-அவுட் சுற்று ஆட்டத்தில் இடம்பெறும்.

பின்னர் டிசம்பர் 12 மற்றும் 13-ந் தேதிகளில் நடைபெறும் காலிறுதி ஆட்டங்களில் முதலிடம் பிடித்த 4 அணிகளுடன் நாக்-அவுட் சுற்றில் முன்னேறிய 4 அணிகளும் பலப்பரீட்சை நடத்தும்.

இதையடுத்து டிசம்பர் 15-ம் தேதி அரையிறுதிப் போட்டிகள் நடைபெறுகின்றன. டிசம்பர் 16-ந் தேதி இறுதிப்போட்டி நடைபெறுகிறது.