2-வது டெஸ்ட்: 243 ரன்களுக்கு ஆஸ்திரேலியாவைச் சுருட்டியது தென் ஆப்பிரிக்கா; ரபாடா 5 விக்கெட்டுகள்!

போர்ட் எலிசபெத்தில் நடைபெற்றும் வரும் ஆஸ்திரேலியா - தென் ஆப்பிரிக்கா இடையிலான 2-வது டெஸ்டில் முதல் இன்னிங்ஸில் 243 ரன்களுக்கு ஆட்டமிழந்துள்ளது ஆஸ்திரேலிய அணி.

டாஸ் வென்ற ஆஸ்திரேலிய அணி எதிர்பார்த்ததுபோல பேட்டிங்கைத் தேர்வு செய்தது. அதேபோல அவர்கள் எதிர்பார்த்த தொடக்கமும் அமைந்தது. முதல் விக்கெட்டுக்கு வார்னரும் பேன்கிராஃப்டும் 98 ரன்கள் சேர்த்தார்கள். பேன்கிராஃப்ட் 38 ரன்களிலும் வார்னர் 63 ரன்களிலும் ஆட்டமிழந்தார்கள். இதன்பிறகு ரபாடாவின் அசத்தலான பந்துவீச்சால் சீரான இடைவெளியில் விக்கெட்டுகள் விழுந்தன. அதிலும் கீழ்வரிசை வீரர்களால் ரபாடாவின் ஆக்ரோஷமான பந்துவீச்சை எதிர்கொள்ளமுடியாமல் போனது. 3 விக்கெட்டுக்கு 161 ரன்கள் என்கிற நல்ல நிலைமையில் இருந்த ஆஸ்திரேலிய அணி, முதல் இன்னிங்ஸில் 71.3 ஓவர்களில் 243 ரன்களுக்கு அனைத்து விக்கெட்டுகளையும் இழந்தது. ரபாடா 5 விக்கெட்டுகளையும் என்ஜிடி 3 விக்கெட்டுகளையும் பிளாண்டர் 2 விக்கெட்டுகளையும் வீழ்த்தினார்கள்.

முதல் நாள் முடிவில் தென் ஆப்பிரிக்க அணி, 12 ஓவர்களில் 1 விக்கெட் இழப்புக்கு 39 ரன்கள் எடுத்துள்ளது. எல்கர் 11, ரபாடா 17 ரன்களுடன் களத்தில் உள்ளார்கள்.