தமிழகத்துக்கு எதிரான ரஞ்சி ஆட்டம்: இரட்டைச் சதம் அடித்தார் அக்‌ஷத் ரெட்டி!

திருநெல்வேலியில் நடைபெற்று வரும் தமிழகத்துக்கு எதிரான ரஞ்சி ஆட்டத்தில் ஹைதராபாத் அணி 2-வது நாளின் முடிவில் 7 விக்கெட் இழப்புக்கு 523 ரன்கள் எடுத்துள்ளது.

டாஸ் வென்ற ஹைதராபாத், பேட்டிங்கைத் தேர்வு செய்தது. முதல் நாளன்று அந்த அணி 3 விக்கெட் இழப்புக்கு 249 ரன்கள் எடுத்தது. அக்‌ஷத் ரெட்டி 114, சந்தீப் 74 ரன்களுடன் களத்தில் இருந்தார்கள்.

27 வயது அக்‌ஷத் ரெட்டி தனது சிறப்பான ஆட்டத்தை இன்றும் தொடர்ந்தார். சந்தீப் சதமடித்த பிறகு 130 ரன்களில் ஆட்டமிழந்தார். ஹைதராபாத் அணி 6 விக்கெட்டுகளை இழந்து 397 ரன்கள் எடுத்த நிலையில் அக்‌ஷத் ரெட்டி - சாய்ராம் ஜோடி தமிழக அணியை மேலும் வெறுப்பேற்றியது. நிதானமாக விளையாடிய அக்‌ஷத் ரெட்டி இரட்டைச் சதமெடுத்து அசத்தினார்.

ஹைதராபாத் அணி 2-ம் நாளின் முடிவில்  177 ஓவர்களில் 7 விக்கெட் இழப்புக்கு 523 ரன்கள் எடுத்துள்ளது. அக்‌ஷத் ரெட்டி 248 ரன்களுடனும் மிலிந்த் 9 ரன்களுடனும் களத்தில் உள்ளார்கள். தமிழக வீரர்களின் தரப்பில் விக்னேஷ், முகமது, ரஹில் ஷா ஆகியோர் தலா 2 விக்கெட்டுகள் எடுத்துள்ளார்கள். இன்னும் இருநாள்களே மீதமுள்ள நிலையில் ஹைதராபாத் அணி இந்த ஆட்டத்தில் அதிகப் புள்ளிகள் எடுக்கும் நிலையில் உள்ளது.