பாட்மிண்டன் நட்சத்திரங்கள்: சாய்னா-காஷ்யப்புக்கு டிசம்பர் 16-இல் திருமணம்

இந்திய பாட்மிண்டன் நட்சத்திரங்கள் சாய்னா நெவால்-பாருபல்லி காஷ்யப் இணைக்கு வரும் டிசம்பர் மாதம் 16-ஆம் தேதி திருமணம் நடைபெறவுள்ளது.
உலகின் முன்னாள் முதல் நிலை வீராங்கனை சாய்னா நெவால், காஷ்யப் இருவரும் கடந்த 2005 முதல் பயிற்சியாளர் கோபிசந்த்திடம் பயிற்சி பெற்று வருகின்றனர். மேலும் கடந்த 10 ஆண்டுகளாக இருவரும் காதலித்து வருகின்றனர். அவர்களது காதல் குறித்து நீண்ட காலமாக வதந்தி பரவி வந்த நிலையில் தற்போது சாய்னா தங்கள் காதலை அவர் உறுதி செய்துள்ளார்.
28 வயதான நெவாலுக்கும், 32 வயதான காஷ்யப்புக்கும் இடையே வரும் டிசம்பர் 16-ஆம் தேதி திருமணம் நடக்கிறது. விளையாட்டில் கவனம் செலுத்துவதற்காக இருவரும் தங்கள் திருமணத்தை ஒத்தி வைத்து வந்தனர். அண்மையில் நடைபெற்ற ஜாகர்த்தா ஆசியப் போட்டியில் சாய்னா வெண்கலம் வென்றார். 
கிராண்ட்ஸ்லாம் பட்டம் வென்ற சானியா மிர்ஸா-பாக். கிரிக்கெட் வீரர் ஷோயிப் மாலிக், ஸ்குவாஷ் வீராங்கனை தீபிகா பல்லிக்கல்-கிரிக்கெட் வீரர் தினேஷ் கார்த்திக் ஆகியோரும் காதலித்து திருமணம் செய்து கொண்டனர்.
அவ்வரிசையில் தற்போது சாய்னாவும்-காஷ்யப்பும் திருமணம் செய்ய உள்ளனர்.