உலகக் கோப்பைப் போட்டிக்கு முன்பு இவ்விஷயங்களில் கவனம் செலுத்த வேண்டும்: விராட் கோலி

ஆஸ்திரேலியாவுக்கு எதிரான ஒருநாள் தொடரை வென்ற இந்திய அணி, அடுத்ததாக நியூஸிலாந்துக்கு எதிராகவும் வெற்றியடையும் நிலையில் உள்ளது. 

நியூஸிலாந்துக்கு எதிரான 2-வது ஒருநாள் ஆட்டத்தில் 90 ரன்கள் வித்தியாசத்தில் வெற்றி பெற்றுள்ளது இந்திய அணி. முதலில் விளையாடிய இந்திய அணி 50 ஓவர்களில் 4 விக்கெட் இழப்புக்கு 324 ரன்கள் எடுத்தது. நியூஸிலாந்து அணி, 40.2 ஓவர்களில் 234 ரன்களுக்கு அனைத்து விக்கெட்டுகளையும் இழந்தது. இந்தியப் பந்துவீச்சாளர்களில் குல்தீப் 4 விக்கெட்டுகளையும் சாஹல், புவனேஸ்வர் தலா 2 விக்கெட்டுகளையும் ஷமி, ஜாதவ் தலா 1 விக்கெட்டையும் வீழ்த்தினார்கள். ஆட்ட நாயகன் விருது ரோஹித் சர்மாவுக்குக் கிடைத்தது.

இந்நிலையில் பரிசளிப்பு விழாவின்போது இந்திய கேப்டன் விராட் கோலி பேசியதாவது:

இந்த ஆடுகளத்துக்கு 325 என்பது சரியான ஸ்கோர் தான். எனினும் நியூஸிலாந்து பேட்டிங்கைக் காணும்போது இந்த ஸ்கோரினால் உங்களால் செளகரியமாக உணரமுடியாது. ஆனால் அனைத்திலும் சிறப்பான பங்களிப்பை வெளிப்படுத்தியுள்ளது நல்ல விஷயம். 34-40 ஓவர்களில் வேகமாக ரன்கள் குவிக்கவேண்டும் என்று நான் திட்டமிட்டிருந்தேன். ஆனால் நான் ஆட்டமிழந்ததால் புதிதாக வந்த பேட்ஸ்மேன் அதிரடியாக விளையாட சிறிது நேரம் தேவைப்பட்டது. உலகக் கோப்பைப் போட்டி நெருங்கும் சமயத்தில் இதுபோன்ற விஷயங்களில் நாங்கள் கவனம் செலுத்தவேண்டும். எடுத்த ஸ்கோரை விடவும் கூடுதலாக 15-20 ரன்கள் எடுக்க எண்ணினோம். அதேசமயம், எங்களுடைய பந்துவீச்சாளர்கள் விக்கெட் எதுவுமின்றி 40 ரன்கள் கொடுப்பதில் ஆர்வம் காண்பிக்கமாட்டார்கள். அதற்குப் பதிலாக 60 ரன்கள் கொடுத்து 3 விக்கெட்டுகளை எடுக்கவே எண்ணுவார்கள். அந்த மனநிலை எங்களுக்கு முக்கியமான ஒன்றாகும் என்று கூறியுள்ளார். 

2-வது ஒருநாள் ஆட்டத்தை 90 ரன்கள் வித்தியாசத்தில் வெற்றி பெற்ற இந்திய அணி, 5 ஆட்டங்கள் கொண்ட ஒருநாள் தொடரில் 2-0 என முன்னிலை பெற்றுள்ளது. 3-வது ஒருநாள் ஆட்டம், இதே மைதானத்தில் திங்கள் அன்று நடைபெறவுள்ளது.