ஜிம்பாப்வே அணியை வீழ்த்தி சாதனை வெற்றியை அடைந்த சிங்கப்பூர் கிரிக்கெட் அணி!

சர்வதேச கிரிக்கெட்டில் முழு உறுப்பினராக உள்ள ஓர் அணியை முதல் முதலாக வீழ்த்திய சாதனையை அடைந்துள்ளது சிங்கப்பூர் கிரிக்கெட் அணி. 

சிங்கப்பூரில் சிங்கப்பூர் - ஜிம்பாப்வே அணிகளுக்கு இடையிலான டி20 ஆட்டம் நடைபெற்றது. முதலில் விளையாடிய சிங்கப்பூர் அணி, 18 ஓவர்களில் 9 விக்கெட் இழப்புக்கு 181 ரன்கள் குவித்தது. அந்த அணியில் ஒருவர் கூட அரை சதம் எடுக்காத போதிலும் ரோஹன் (39 ரன்கள்), டேவிட் (41 ரன்கள்), மண்ப்ரீத் சிங் (41 ரன்கள்) ஆகியோர் பொறுப்புடன் விளையாடி, விரைவாக ரன்கள் சேர்த்து பெரிய ஸ்கோரை எட்ட உதவினார்கள்.

கடினமான இலக்கை எதிர்கொண்ட ஜிம்பாப்வே அணி, 18 ஓவர்களில் 7 விக்கெட் இழப்புக்கு 177 ரன்கள் எடுத்து 4 ரன்கள் வித்தியாசத்தில் தோற்றது. கேப்டன் வில்லியம்ஸ் 66 ரன்கள் எடுத்தார். கடைசி ஓவரில் ஜிம்பாப்வே வெற்றி பெற 10 ரன்கள் தேவைப்பட்டபோது அந்த அணியால் ஒரு பவுண்டரி கூட அடிக்க முடியாமல் 5 ரன்கள் மட்டுமே எடுக்க முடிந்தது.