ஆல்-ரௌண்டர்கள் தரவரிசையில் ஜடேஜா முதலிடம்

ஆல்-ரௌண்டர்களுக்கான ஐசிசி டெஸ்ட் தரவரிசையில் இந்தியாவின் ரவீந்திர ஜடேஜா முதலிடத்தைப் பிடித்துள்ளார்.

மேற்கிந்தியத் தீவுகள், தென் ஆப்பிரிக்கா அணிகளுக்கிடையிலான டெஸ்ட் தொடர் நிறைவடைந்த நிலையில் தரவரிசைப் பட்டியலை ஐசிசி வெளியிட்டுள்ளது. இதில் ஆல்-ரௌண்டர்களுக்கான தரவரிசையில் மேற்கிந்தியத் தீவுகள் வீரர் ஜேசன் ஹோல்டர் 28 புள்ளிகளை இழந்துள்ளார். இதன்மூலம், ரவீந்திர ஜடேஜா 386 புள்ளிகளுடன் முதலிடத்துக்கு முன்னேறியுள்ளார். கடந்த ஆகஸ்ட் 2017-க்குப் பிறகு ஜடேஜா மீண்டும் முதலிடத்தைப் பிடித்துள்ளது குறிப்பிடத்தக்கது. 

தென் ஆப்பிரிக்க வீரர் குயின்டன் டி காக் பேட்டிங் தரவரிசையில் 18 மாதங்களுக்குப் பிறகு மீண்டும் முதல் 10 இடங்களுக்குள் நுழைந்து 10-வது இடத்தைப் பிடித்துள்ளார். 

பந்துவீச்சில் தென் ஆப்பிரிக்காவின் ககிசோ ரபாடா 1 இடம் முன்னேறி 6-வது இடத்தைப் பிடித்துள்ளார்.