ஆண்டர்சனின் மேஜிக்கால் சதத்தை நழுவவிட்ட ரோஹித் (விடியோ)

இங்கிலாந்துடனான 2-வது டெஸ்ட் ஆட்டத்தில் இந்திய பேட்ஸ்மேன் ரோஹித் சர்மா 83 ரன்களுக்கு ஜேம்ஸ் ஆண்டர்சனின் மேஜிக் பந்தால் போல்டானார்.

இங்கிலாந்து, இந்தியா அணிகளுக்கிடையிலான 2-வது டெஸ்ட் ஆட்டம் லார்ட்ஸ் மைதானத்தில் தொடங்கி நடைபெற்று வருகிறது. டாஸ் வென்ற இங்கிலாந்து கேப்டன் ஜோ ரூட் முதலில் பந்துவீச்சைத் தேர்வு செய்தார்.

தொடக்க ஆட்டக்காரர்களாகக் களமிறங்கிய ரோஹித் சர்மா மற்றும் கேஎல் ராகுல் இந்த முறையும் இந்தியாவுக்குப் பிரமாதமான தொடக்கத்தைத் தந்தனர். ராகுல் நிதானம் காட்ட, ரோஹித் அவ்வப்போது பவுண்டரிகள் அடித்து ரன்களை உயர்த்தி வந்தார். இதன்மூலம், இந்த இணை முதல் விக்கெட்டுக்கு 100 ரன்களைக் கடந்தது.

இதையும் படிக்க | ஒலிம்பிக் பதக்க மங்கை லவ்லினாவுக்கு டிஎஸ்பி பதவி: அசாம் முதல்வர்

ரோஹித் சர்மாவே ரன் குவிப்பில் ஆதிக்கம் செலுத்தியதால், முதல் 100 ரன்களில் அவர் மட்டுமே 75 ரன்களை எடுத்திருந்தார்.

அந்நிய மண்ணில் முதல் டெஸ்ட் சதத்தை நோக்கி விளையாடி வந்த ரோஹித் சர்மா 83 ரன்கள் எடுத்திருந்தபோது ஆண்டர்சனின் சிறப்பான பந்தால் எதிர்பாராத விதமாக போல்டானார்.

சற்று முன்பு வரை இந்திய அணி முதல் இன்னிங்ஸில் 2 விக்கெட்டுகள் இழப்புக்கு 187 ரன்கள் எடுத்து விளையாடி வருகிறது. ராகுல் 74 ரன்களுடனும், கேப்டன் விராட் கோலி 7 ரன்களுடனும் விளையாடி வருகின்றனர்.