ஐபிஎல் 2021 போட்டியின் நட்சத்திரமான வெங்கடேஷ் ஐயர், சையத் முஷ்டாக் அலி டி20 போட்டியிலும் தன் ஆல்ரவுண்டர் திறமையை வெளிப்படுத்தி வருகிறார்.
ஐபிஎல் போட்டியில் கொல்கத்தா நைட்ரைடர்ஸ் அணிக்காக விளையாடிய வெங்கடேஷ் ஐயர், 10 ஆட்டங்களில் 4 அரை சதங்களுடன் 370 ரன்கள் எடுத்தார். ஸ்டிரைக் ரேட் - 128.47. கிட்டத்தட்ட 9 ஓவர்கள் வீசி 3 விக்கெட்டுகளும் எடுத்தார். இதனால் ஆல்ரவுண்டராக இந்திய அணியில் விரைவில் இடம்பெறுவார் என்கிற எதிர்பார்ப்பு ஏற்பட்டுள்ளது. இந்தூரில் வசிக்கும் 26 வயது வெங்கடேஷ் ஐயர், தமிழ்க் குடும்பத்தைச் சேர்ந்தவர்.
இந்நிலையில் சையத் முஷ்டாக் அலி போட்டியிலும் சிறப்பாக விளையாடி வருகிறார் வெங்கடேஷ் ஐயர்.
இன்று தில்லியில் நடைபெற்ற பிஹாருக்கு எதிரான போட்டியில் மத்தியப் பிரதேச அணிக்காக விளையாடிய வெங்கடேஷ் ஐயர், 20 பந்துகளில் 36 ரன்கள் எடுத்து அணியின் வெற்றிக்கு உதவினார். பந்துவீச்சில் 4 ஓவர்கள் வீசி 2 ரன்கள் மட்டும் கொடுத்து 2 விக்கெட்டுகளை வீழ்த்தினார்.
சையத் முஷ்டாக் அலி போட்டியில் வெங்கடேஷ் ஐயர்
37(23) & 1/13(2)
50*(41) & 2/20(3)
31(24) & 0/26(3)
36*(20) & 2/2(4)
ஐபிஎல் போட்டியில் மட்டுமல்லாமல் சையத் முஷ்டாக் அலி போட்டியிலும் நன்றாக விளையாடி அனைவர் கவனத்தையும் ஈர்த்துள்ளார் வெங்கடேஷ் ஐயர். ஐபிஎல் 2022 போட்டிக்காக நடைபெறும் மெகா ஏலத்தில் வெங்கடேஷ் ஐயருக்கு ரூ. 14 கோடி வரை கிடைக்க வாய்ப்புள்ளது என முன்னாள் வீரர் சஞ்சய் மஞ்ச்ரேக்கர் சமீபத்தில் கூறினார்.