கோவை ரஞ்சி ஆட்டம்: சாய் சுதர்சன் சதம், தமிழ்நாடு 273/4 ரன்கள்!

ஆந்திர அணிக்கு எதிரான ரஞ்சி கோப்பை ஆட்டத்தில் தமிழக அணி, 77 ஓவர்களில் 4 விக்கெட் இழப்புக்கு 273 ரன்கள் எடுத்து வலுவான நிலையில் உள்ளது.

2022-23 ரஞ்சி கோப்பை போட்டியில் ஹைதராபாத் அணிக்கு எதிரான முதல் ஆட்டத்தை டிரா செய்த தமிழக அணி, 3 புள்ளிகளைப் பெற்றது. 2-வது ஆட்டத்தில் ஆந்திராவை எதிர்கொள்கிறது.

தமிழ்நாடு - ஆந்திரா அணிகளுக்கு இடையிலான ரஞ்சி ஆட்டம் கோயம்புத்தூர் எஸ்என்ஆர் கல்லூரி மைதானத்தில் நடைபெற்று வருகிறது. டாஸ் வென்ற ஆந்திர அணி பேட்டிங்கைத் தேர்வு செய்தது. தமிழக அணியில் வாஷிங்டன் சுந்தர் இடம்பெற்றுள்ளார்.

32 வருடங்கள் கழித்து கோயம்புத்தூரில் ரஞ்சி கோப்பை ஆட்டம் நடைபெறுகிறது. கடந்த வருடம் சென்னை சேப்பாக்கம் மைதானத்தில் இங்கிலாந்துக்கு எதிரான இரு டெஸ்டுகள் நடைபெற்றபோது ஆடுகள வடிவமைப்பாளராக இருந்த ரமேஷ் குமார், இந்த மைதானத்தின் ஆடுகள வடிவமைப்பாளராகச் செயல்படுகிறார்.

முதல் நாளன்று ஆந்திர அணி, 5 விக்கெட் இழப்புக்கு 277 ரன்களுடன் நல்ல நிலைமையில் இருந்தது. ஆனால் இன்று மீதமுள்ள 5 விக்கெட்டுகளையும் 20 ரன்களுக்கு வீழ்த்தி அசத்தியது தமிழக அணி. ஆந்திரா முதல் இன்னிங்ஸில் 100.1 ஓவர்களில் 297 ரன்களுக்கு அனைத்து விக்கெட்டுகளையும் இழந்தது. தொடக்க வீரர் அபிஷேக் ரெட்டி அதிகபட்சமாக 85 ரன்கள் எடுத்தார். சாய் கிஷோர், சந்தீப் வாரியர் தலா 3 விக்கெட்டுகளை வீழ்த்தினார்கள். 

தமிழக அணி முதல் இன்னிங்ஸில் சிறப்பாக விளையாடி வருகிறது.  2-வது நாள் முடிவில் தமிழக அணி, 77 ஓவர்களில் 4 விக்கெட் இழப்புக்கு 273 ரன்கள் எடுத்துள்ளது. தொடக்க வீரர் சாய் சுதர்சன் 113, பாபா அபரஜித் 88 ரன்கள் எடுத்தார்கள். வாஷிங்டன் சுந்தர் 7 ரன்களுடனும் விஜய் சங்கர் ரன் எதுவும் எடுக்காமலும் களத்தில் உள்ளார்கள். தமிழக அணி 24 ரன்கள் பின் தங்கியுள்ளநிலையில் கைவசம் 6 விக்கெட்டுகள் உள்ளதால் முதல் இன்னிங்ஸில் குறைந்தது 100 ரன்கள் முன்னிலை பெறும் என எதிர்பார்க்கப்படுகிறது. 

ரஞ்சியில் ரஹானே இரட்டைச் சதம்: இந்திய அணியில் மீண்டும் வாய்ப்பு?

40 லட்சம் ரசிகர்களின் அன்பில் திக்குமுக்காடிய மெஸ்ஸி! (படங்கள்)

இன்னொரு சாதனை: முட்டையைத் தோற்கடித்த மெஸ்ஸி!

கே.எல். ராகுலுக்குக் காயம்: 2-வது டெஸ்டில் விளையாடுவாரா?