நிறைவடைந்தன காமன்வெல்த் போட்டிகள்: இந்திய அணி சாதித்தது என்ன?

நிறைவடைந்தன காமன்வெல்த் போட்டிகள்: இந்திய அணி சாதித்தது என்ன?

மல்யுத்தம், பளு தூக்குதல், பாட்மிண்டன், டேபிள் டென்னிஸ் (பாரா டென்னிஸ் உள்பட) ஆகிய விளையாட்டுகளில்...

இங்கிலாந்து ராணியால் ஆளப்பட்ட 72 நாடுகள் கூட்டமைப்பு காமன்வெல்த் என அழைக்கப்படுகிறது. இந்நாடுகளுக்கு 4 ஆண்டுகளுக்கு ஒருமுறை போட்டிகள் நடத்தப்படுகின்றன. உலகின் பெரிய விளையாட்டுத் திருவிழாக்களில் ஒன்றாக காமன்வெல்த் போட்டி உள்ளது. கடைசியாக கடந்த 2018-இல் ஆஸ்திரேலியாவின் கோல்ட்கோஸ்ட்டில் நடைபெற்ற காமன்வெல்த் போட்டியில் இந்தியா 26 தங்கம், 20 வெள்ளி, 20 வெண்கலத்துடன் மொத்தம் 66 பதக்கங்களுடன் மூன்றாவது இடத்தைப் பெற்றது. 

இந்த வருடம் இங்கிலாந்தின் பிர்மிங்கம் நகரில் நடைபெற்ற காமன்வெல்த் போட்டிகள் நேற்றுடன் முடிவடைந்தன. கோல்ட்கோஸ்ட் காமன்வெல்த்தில் 66 பதக்கங்களை வென்ற இந்திய அணி, பிர்மிங்கம் போட்டியில் 61 பதக்கங்களை வென்றது. இப்போட்டியில் ஐயாயிரத்துக்கும் அதிகமான வீரர்கள் பங்கேற்றார்கள். 

இம்முறை இந்திய அணி 22 தங்கம், 16 வெள்ளி, 23 வெண்கலப் பதக்கங்களுடன் பதக்கப் பட்டியலில் 4-ம் இடம் பிடித்தது. கடைசி நாளன்று பாட்மிண்டனில் பி.வி. சிந்து, சாத்விக் - சிராஜ் ஜோடி, லக்‌ஷயா சென், டேபிள் டென்னிஸில் சரத் கமல் ஆகியோர் தங்கப் பதக்கம் வென்றார்கள். இந்திய ஆடவர் ஹாக்கி அணி வெள்ளிப் பதக்கம் வென்றது. டேபிள் டென்னிஸில் தமிழக வீரர் சத்யன் வெண்கலப் பதக்கம் வென்றார். 

இந்திய அணி 12 விளையாட்டுகளில் பதக்கங்களை வென்றது. மல்யுத்தம், பளு தூக்குதல், பாட்மிண்டன், டேபிள் டென்னிஸ் (பாரா டென்னிஸ் உள்பட) ஆகிய விளையாட்டுகளில் இந்திய அணி தான் அதிகப் பதக்கங்களை வென்றது. மல்யுத்த விளையாட்டில் இந்திய அணிக்கு அதிகபட்சமாக 6 தங்கப் பதக்கங்கள் கிடைத்தன. அதிகத் தங்கப் பதக்கங்களை வென்றவர் - தமிழகத்தின் சரத் கமல். டேபிள் டென்னிஸ் விளையாட்டில் ஆடவர் அணி, ஒற்றையர், கலப்பு இரட்டையர் என மூன்று போட்டிகளில் அவர் தங்கம் வென்றார். மேலும் ஆடவர் இரட்டையர் போட்டியில் வெள்ளிப் பதக்கம் என ஒரே போட்டியில் 4 பதக்கங்களுடன் மகத்தான சாதனையை அவர் படைத்துள்ளார். 

ஹாக்கி போட்டியில் இந்தியா முதல்முறையாக ஆடவர், மகளிர் என இரு பிரிவுகளிலும் பதக்கம் வென்றுள்ளது. இந்திய ஆடவர் ஹாக்கி அணி வெள்ளிப் பதக்கமும் மகளிர் அணி வெண்கலப் பதக்கமும் வென்றார்கள். 

2026 காமன்வெல்த் போட்டி ஆஸ்திரேலியாவின் விக்டோரியாவில் நடைபெறவுள்ளது. 

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com