வீரர்களுக்கான ஏலம், டிஆர்எஸ்: டிஎன்பிஎல் போட்டியில் புதிய மாற்றங்கள்!

டிஎன்பிஎல் போட்டியில் அடுத்த வருடம் முதல் வீரர்களுக்கான ஏலம் நடைபெறவுள்ளது. 

இந்த வருடம் கோயம்புத்தூரில் நடைபெற்ற டிஎன்பில் டி20 போட்டியின் இறுதிச் சுற்றில் ஷாருக் கான் தலைமையிலான கோவை அணி, 17 ஓவர்களில் 9 விக்கெட் இழப்புக்கு 138 ரன்கள் எடுத்தது. சாய் சுதர்சன் 65 ரன்கள் எடுத்தார். சந்தீப் வாரியர் 4 விக்கெட்டுகளை வீழ்த்தினார். சேப்பாக் அணி 4 ஓவர்களில் 2 விக்கெட் இழப்புக்கு 14 ரன்கள் எடுத்தபோது மழை காரணமாக ஆட்டம் பாதிக்கப்பட்டது. ஆட்டத்தைத் தொடரமுடியாத நிலை ஏற்பட்டதால் டிஎன்பிஎல் கோப்பையை கோவை, சேப்பாக் ஆகிய இரு அணிகளும் பகிர்ந்துகொண்டன. 5-வது ஓவர் மட்டும் வீசி முடிக்கப்பட்டிருந்தால் சேப்பாக் அணி தோல்வியடைந்திருக்கும். ஏனெனில் அந்த அணி 2 விக்கெட்டுகள் வீழ்ந்த நிலையில் 24 ரன்கள் பின்தங்கியிருந்தது. இறுதிச்சுற்றுக்கான ஆட்ட நாயகன் விருதை சந்தீப் வாரியரும் தொடர் நாயகன் விருதை சஞ்சய் யாதவும் வென்றார்கள். டிஎன்பிஎல் கோப்பையை சேப்பாக் அணி 4-வது முறையாக வென்றுள்ளது. கோவை அணி கோப்பையை வெல்வது இதுவே முதல்முறை. 

இந்நிலையில் 2023 முதல் டிஎன்பிஎல் போட்டி புதிய மாற்றங்களுடன் நடைபெறப் போகிறது.

* அடுத்த ஆண்டு முதல் வீரர்களுக்கான ஏலம் நடைபெறவுள்ளது. இதற்காக ஒவ்வொரு அணியும் ரூ. 70 லட்சம் வரை செலவு செய்ய அனுமதி உண்டு.  

* 2023-ல் ஜூன், ஜூலை மாதங்களில் போட்டி நடைபெறவுள்ளது.

* டிஎன்பிஎல் 7-வது பருவத்தில் டிஆர்எஸ் வசதி வழங்கப்படவுள்ளது. 

* போட்டியில் பங்கேற்க விருப்பப்படும் வீரர்கள் டிசம்பர் 28 முதல் ஜனவரி 20-ம் தேதிக்குள் தங்களது பெயர்களைப் பதிவு செய்ய வேண்டும்.

வீரர்களின் ஏலம், டிஆர்எஸ் போன்ற மாற்றங்களால் டிஎன்பில் டி20 போட்டி மீது ரசிகர்களுக்குக் கூடுதல் ஆர்வம் ஏற்படும் என எதிர்பார்க்கப்படுகிறது.