அதிக டெஸ்ட் விக்கெட்டுகள்: டேல் ஸ்டெய்னைத் தாண்டிய அஸ்வின்

டெஸ்ட் கிரிக்கெட்டில் அதிக விக்கெட்டுகள் எடுத்த வீரர்களின் பட்டியலில் டேல் ஸ்டெய்னைத் தாண்டிச் சென்றார் ஆர். அஸ்வின்.

இலங்கைக்கு எதிரான மொஹலி டெஸ்டில் 6 விக்கெட்டுகள் எடுத்ததோடு பேட்டிங்கில் அரை சதமும் எடுத்து அசத்தினார் அஸ்வின். மேலும் டெஸ்ட் கிரிக்கெட்டில் கபில் தேவ் எடுத்திருந்த 434 விக்கெட்டுகளைத் தாண்டி சென்று, 436 விக்கெட்டுகளுடன் அதிக டெஸ்ட் விக்கெட்டுகள் எடுத்த இந்திய வீரர்களில் 2-ம் இடத்துக்கு முன்னேறினார்.

இந்நிலையில் பெங்களூர் டெஸ்டில் மேலும் ஒரு சாதனையை நிகழ்த்தியுள்ளார். முதல் இன்னிங்ஸில் 2 விக்கெட்டுகளை வீழ்த்திய அஸ்வின், இன்று குசால் மெண்டிஸை 54 ரன்களிலும் தனஞ்ஜெயா டி சில்வாவை 4 ரன்களிலும் வீழ்த்தினார். இதையடுத்து 93 டெஸ்டுகளில் 439 விக்கெட்டுகளை வீழ்த்திய டேல் ஸ்டெய்னைத் தாண்டிச் சென்றார்.

இதுவரை டெஸ்ட் கிரிக்கெட்டில் 86 ஆட்டங்களில் 440 விக்கெட்டுகள் எடுத்துள்ளார் அஸ்வின். இதன்மூலம் அதிக டெஸ்ட் விக்கெட்டுகள் எடுத்த வீரர்களின் பட்டியலில் 8-ம் இடத்துக்கு முன்னேறியுள்ளார். இவருக்கு முன்னால் வால்ஷ் 519 விக்கெட்டுகளுடன் 7-ம் இடத்தில் உள்ளார்.