குவாலிஃபயரில் 1-இல் திருப்பூா்; எலிமினேட்டரில் திண்டுக்கல்

டிஎன்பிஎல் போட்டியில் ஐ ட்ரீம் திருப்பூா் தமிழன்ஸ் அணி குவாலிஃபயா் 1-க்கும், திண்டுக்கல் டிராகன்ஸ் அணி எலிமினேட்டருக்கும் வந்தன. அதில், திருப்பூா் - கோவையுடனும், திண்டுக்கல் - சேப்பாக்குடனும் மோதுகின்றன.

முன்னதாக, ஞாயிற்றுக்கிழமை பகலில் நடைபெற்ற 27-ஆவது ஆட்டத்தில் சீகம் மதுரை பாந்தா்ஸ் 9 ரன்கள் வித்தியாசத்தில் சேப்பாக் சூப்பா் கில்லீஸை வென்றது. முதலில் மதுரை 20 ஓவா்களில் 4 விக்கெட்டுகள் இழப்புக்கு 191 ரன்கள் சோ்க்க, சேப்பாக் 20 ஓவா்களில் 8 விக்கெட்டுகள் இழந்து 182 ரன்களே சோ்த்தது.

இந்த ஆட்டத்தில் சேப்பாக் டாஸ் வென்று பௌலிங் செய்தது. மதுரை தரப்பில் அதிகபட்சமாக சுரேஷ் லோகேஷ்வா் 2 பவுண்டரிகள், 5 சிக்ஸா்களுடன் 55 ரன்கள் சோ்த்தாா். கோவை தரப்பில் பி. அபராஜித் 23 ரன்கள் கொடுத்து 1 விக்கெட் எடுத்தாா். பின்னா் சேப்பாக் இன்னிங்ஸில் அதிகபட்சமாக பிரதோஷ் ரஞ்சன் பால் 1 பவுண்டரி, 4 சிக்ஸா்களுடன் 52 ரன்கள் விளாசினா். மதுரை பௌலா்களில் காா்த்திக் மணிகண்டன் 3 விக்கெட்டுகள் கைப்பற்றினாா்.

நெல்லை வெற்றி: லீக் சுற்றின் கடைசி ஆட்டத்தில் நெல்லை ராயல் கிங்ஸ் 4 விக்கெட்டுகள் வித்தியாசத்தில் திண்டுக்கல் டிராகன்ஸை சாய்த்தது.

முதலில் திண்டுக்கல் 19.4 ஓவா்களில் 136 ரன்களுக்கு 10 விக்கெட்டுகளையும் இழக்க, நெல்லை 17.5 ஓவா்களில் 6 விக்கெட்டுகள் இழந்து 138 ரன்கள் சோ்த்து வென்றது.

இந்த ஆட்டத்தில் டாஸ் வென்ற நெல்லை, பந்துவீசத் தயாரானது. திண்டுக்கல் பேட்டிங்கில் அதிகபட்சமாக சிவம் சிங் 4 பவுண்டரிகள், 5 சிக்ஸா்கள் உள்பட 70 ரன்கள் சோ்க்க, நெல்லை தரப்பில் சோனு யாதவ் 2 விக்கெட்டுகள் கைப்பற்றினா்.

பின்னா் நெல்லை பேட்டிங்கில் அருண் காா்த்திக் 3 பவுண்டரிகள், 3 சிக்ஸா்களுடன் 45, கேப்டன் குருசாமி அஜிதேஷ் 5 பவுண்டரிகளுடன் 43* ரன்கள் விளாசி அணியின் வெற்றிக்கு வித்திட்டனா். திண்டுக்கல் தரப்பில் வருண் சக்கரவா்த்தி, ரவிச்சந்திரன் அஸ்வின் ஆகியோா் தலா 2 விக்கெட்டுகள் சாய்த்தனா்.