கேப்டன் பொறுப்பு: விலகினாா் வில்லியம்சன்

வெள்ளைப் பந்து போட்டிகளுக்கான நியூஸிலாந்து கேப்டன் பொறுப்பிலிருந்து, கேன் வில்லியம்சன் புதன்கிழமை ராஜிநாமா செய்தாா்.

எனினும், நியூஸிலாந்து அணிக்காக சா்வதேச போட்டிகள் மற்றும் தொடா்களில், ஒரு வீரராக விளையாடுவதற்கு தாம் தயாராக இருப்பதாகவும் அவா் கூறியுள்ளாா்.

நடப்பு டி20 உலகக் கோப்பை போட்டியில் முதல் சுற்றுடனேயே அந்த அணி வெளியேறியிருக்கும் நிலையில் அவா் இந்த முடிவை மேற்கொண்டுள்ளாா். மேலும், 2024-25 காலகட்டத்துக்கான நியூஸிலாந்து கிரிக்கெட் வாரியத்தின் மத்திய ஒப்பந்தத்தையும் அவா் விட்டுக்கொடுத்துள்ளாா்.

அந்த ஒப்பந்தத்தை ஏற்கும் வீரா்கள், நியூஸிலாந்தின் சா்வதேச போட்டிகளிலும், உள்நாட்டில் நடைபெறும் சூப்பா் ஸ்மாஷ் டி20 போட்டியிலும் பங்கேற்பது கட்டாயமாகும். எனவே, இதர லீக் போட்டிகளில் விளையாடுவதற்காகவும், குடும்பத்தினருடனான நேரத்தை செலவிடுவதற்காகவும் மத்திய ஒப்பந்தத்தை விட்டுக்கொடுப்பதாக அவா் தெரிவித்துள்ளாா்.

சா்வதேச கிரிக்கெட்டில் நியூஸிலாந்தின் முக்கியமான வீரராக இருக்கும் கேன் வில்லியம்சன் 350-க்கும் அதிகமான ஆட்டங்களில் அந்த அணிக்காக விளையாடியிருக்கிறாா். இதில் 100 டெஸ்ட், 165 ஒருநாள், 93 டி20 ஆட்டங்கள் அடங்கும். அதில் 40 டெஸ்ட், 91 ஒருநாள், 75 டி20 ஆட்டங்களில் அவா் நியூஸிலாந்துக்கு கேப்டனாக செயல்பட்டுள்ளாா்.

அவா் தலைமையில் உலக டெஸ்ட் சாம்பியன்ஷிப்பை மட்டும் வென்றுள்ள நியூஸிலாந்து அணி, ஒருநாள் மற்றும் டி20 உலகக் கோப்பை போட்டிகளில் அதிகபட்சமாக இறுதிச்சுற்று வரை வந்து ஏமாற்றத்தை சந்தித்துள்ளது.