இந்தியாவுக்கு எதிரான டெஸ்ட் தொடருக்கு இங்கிலாந்து தயாராக இல்லை: முன்னாள் இங்கிலாந்து வீரர்

இந்தியாவுக்கு எதிரான டெஸ்ட் தொடருக்கு இங்கிலாந்து முழுமையாகத் தயாராக இல்லை என அந்த அணியின் முன்னாள் வீரர் அலெய்ஸ்டர் குக் தெரிவித்துள்ளார்.

இங்கிலாந்து அணி இந்தியாவில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் விளையாடவுள்ளது. இரு அணிகளுக்கும் இடையிலான முதல் டெஸ்ட் போட்டி வருகிற ஜனவரி 25  ஆம் தேதி ஹைதராபாத்தில் தொடங்குகிறது. 

இதையும் படிக்க: இங்கிலாந்துக்கு எதிரான டெஸ்ட் தொடரில் இவர் தாக்கத்தை ஏற்படுத்துவார்: ஜாகிர் கான்

இந்த நிலையில், இந்தியாவுக்கு எதிரான டெஸ்ட் தொடருக்கு இங்கிலாந்து முழுமையாக தயாராக இல்லை என அந்த அணியின் முன்னாள் வீரர் அலெய்ஸ்டர் குக் தெரிவித்துள்ளார்.

இது தொடர்பாக அவர் பேசியதாவது: இங்கிலாந்து அணிக்கு போதுமான பயிற்சி இல்லை. இந்தியாவுக்கு எதிராக கடந்த 2012 ஆம் ஆண்டு நடைபெற்ற டெஸ்ட் தொடரில் இங்கிலாந்து வெற்றி பெற்றது. 2012 ஆம் ஆண்டு நடைபெற்ற டெஸ்ட் தொடருக்கு முன்னதாக இந்தியாவுடன் எங்களுக்கு 3 பயிற்சி ஆட்டங்கள் இருந்தன. அந்த பயிற்சியாட்டங்கள் எங்களை தயார்படுத்திக் கொள்வதற்கு உதவியாக இருந்தது. தற்போது பயிற்சி ஆட்டங்கள் இல்லாததால் போட்டியை நடத்தும் நாடுகளே ஆதிக்கம் செலுத்துகின்றன. இது ஆரோக்கியமான டெஸ்ட் கிரிக்கெட் கிடையாது.

இதையும் படிக்க: இங்கிலாந்துக்கு எதிரான டெஸ்ட்டில் விராட் கோலி விலகல்!

இங்கிலாந்து அணி பேஷ்பால் கிரிக்கெட்டில் சிறப்பாக செயல்பட்டு வருகிறது. பாகிஸ்தானுக்கு எதிரான 3 போட்டிகள் கொண்ட டெஸ்ட் தொடர் இங்கிலாந்தின் பேஷ்பால் அணுகுமுறைக்கு சிறப்பானதாக அமைந்தது. அந்தத் தொடரை இங்கிலாந்து முழுமையாக கைப்பற்றியது. இந்தியாவுக்கு எதிராகவும் இங்கிலாந்து அணி தனது பேஷ்பால் யுக்தியைப் பயன்படுத்தி வெற்றி பெறும் என்பதில் எந்த ஒரு சந்தேகமும் இல்லை என்றார்.