தேர்தல் ஆலோசனைக் கூட்டம்: அதிமுக - திமுக வேட்பாளர்கள் மோதல்

ஈரோடு, அக். 8: ஈரோட்டில் தேர்தல் ஆலோசனைக் கூட்டத்தில் அதிமுக - திமுக வேட்பாளர்கள் மோதலில் ஈடுபட்டனர்.

தேர்தல் விதிமுறைகள் தொடர்பான அரசியல் கட்சியினருக்கான ஆலோசனைக் கூட்டம் ஈரோடு மாநகராட்சி ஆணையர் பி.பாலச்சந்திரன் தலைமையில் சனிக்கிழமை நடைபெற்றது. அப்போது அரசின் இலவச திட்டங்கள் குறித்து அதிமுக வேட்பாளர்கள் வெளியிட்டுள்ள துண்டு பிரசுரங்கள் தொடர்பாக அதிமுக - திமுக வேட்பாளர்களிடையே பிரச்னை ஏற்பட்டது. இதுதொடர்பாக உரிய முறையில் புகார் தெரிவித்தால் சம்பந்தப்பட்டவர்கள் மீது நடவடிக்கையெடுப்பதாக ஆணையர் உறுதியளித்தார். இந்நிலையில் திடீரென இரு கட்சி வேட்பாளர்களும் ஒருவரை ஒருவர் தாக்கிக் கொண்டனர். இருக்கைகளை எடுத்து வீசி எறிந்தனர். இதனையடுத்து போலீஸார் அங்கு வந்து கூட்டத்தைக் கலைத்தனர். இதனால் கூட்டம் பாதியில் முடிந்தது. மாலையில் நடைபெறுவதாக அறிவிக்கப்பட்ட 31 முதல் 60 வார்டு வரையிலான ஆலோசனைக் கூட்டமும் ரத்து செய்யப்பட்டது.