கருணாநிதியிடம் பிறந்த நாள் ஆசி பெற்றார் கனிமொழி

திமுக மாநிலங்களவை உறுப்பினர் கனிமொழி தனது பிறந்த நாளையொட்டி கட்சியின் தலைவரும், தந்தையுமான கருணாநிதியிடம் ஆசி பெற்றார்.

கனிமொழி தனது 45-வது பிறந்த நாளை சென்னை சிஐடி காலனியில் உள்ள வீட்டில் சனிக்கிழமை கேக் வெட்டி கொண்டாடினார்.

கருணாநிதி, ராசாத்தி ஆகியோரிடம் அவர் வாழ்த்து பெற்றார். திமுக பொருளாளர் மு.க.ஸ்டாலின் நேரில் வந்து கனிமொழிக்கு பூங்கொத்து கொடுத்து பொன்னாடை போர்த்தி வாழ்த்து தெரிவித்தார்.

மத்திய அமைச்சர்கள் பழநிமாணிக்கம், ஜெகத்ரட்சகன், துணைப் பொதுச்செயலாளர் வி.பி.துரைசாமி, எஸ்.பி.சற்குணபாண்டியன், நாடாளுமன்ற உறுப்பினர்கள் டி.கே.எஸ்.இளங்கோவன், ஆ.ராசா, காங்கிரஸ் கட்சியின் மூத்த தலைவர் பீட்டர் அல்போன்ஸ், பேராயர் எஸ்றா. சற்குணம் உள்பட ஏராளமானோர் அவருக்கு வாழ்த்து தெரிவித்தனர்.