இலங்கையின் போர் குற்றத்தில் உள்நாட்டு விசாரணையை ஏற்றுக் கொள்ள முடியாது: பினாங் துணை முதல்வர் ராமசாமி

இலங்கையில் நடந்த போர் குற்றம் தொடர்பாக உள்நாட்டு விசாரணையை ஏற்றுக் கொள்ள முடியாது. சர்வதேச விசாரணை நடத்தப்பட்டால்தான் நியாயம் கிடைக்கும் என பினாங் துணை முதல்வர் ராமசாமி கூறியுள்ளார்.

திருப்பூர், பல்லடம் அருகே மதிமுக சார்பில் நடைபெற உள்ள அண்ணாவின் 107-வது பிறந்த நாள் விழா மற்றும் திராவிட இயக்கத்தின் நூற்றாண்டு விழாவில் நடைபெறுகிறது. இதில் கலந்துகொள்வதற்காக, மதிமுக பொதுச் செயலாளர் வைகோவுடன் பினாங் துணை முதல்வர் ராமசாமி கோவைக்கு விமானம் மூலம் வந்தார்.

அப்போது, அவர் செய்தியாளர்களிடம் கூறுகையில், நான் பிறந்தது வளர்ந்ததெல்லாம் பினாங். ஆனால் எனது பூர்வீகம் வெள்ளக்கோயில்தான். கடந்த 1920 ஆம் ஆண்டு எனது தாத்தா, அப்பா உள்ளிட்டோர் பினாங்குக்கு குடிபெயர்ந்தனர். வெள்ளக்கோயிலுக்கு 5 முறை வந்து சென்றுள்ளேன். ஆனால் எனக்கு கடந்த 5 ஆண்டுகளாக தமிழ் மண்ணில் காலடி எடுத்து வைக்க முடியாத நிலை ஏற்பட்டது.

தற்போது, பிரதமர் மோடி, வைகோவின் முயற்சியால் மீண்டும் தமிழ் மண்ணில் கால் வைத்துள்ளேன்.

எங்களைப் பொறுத்தவரை தமிழீழம் உருவாக வேண்டும் என்பதே விருப்பம். இலங்கையில் நடந்த போர் குற்றம் தொடர்பாக உள்நாட்டு விசாரணையை ஏற்றுக் கொள்ள முடியாது. சர்வதேச விசாரணை நடத்தப்பட்டால்தான் நியாயம் கிடைக்கும்.

சர்வதேச விசாரணைக்கு இந்தியா மட்டுமின்றி உலக நாடுகளும் வலியுறுத்த வேண்டும் என கூறினார்.