சிந்துவெளி நாகரிகத்தின் அடையாளங்களைக் காக்க வேண்டும்: கருணாநிதி வேண்டுகோள்

வீடுகள் கட்டுவதற்காக சிந்துவெளி நாகரிகத்தின் அடையாளச் சின்னங்கள் சிதைக்கப்படுவதில் இருந்து காக்க வேண்டும் என்று பிரதமர் நரேந்திர மோடிக்கு திமுக தலைவர் கருணாநிதி வேண்டுகோள் விடுத்துள்ளார்.
 இதுதொடர்பாக திங்கள்கிழமை அவர் வெளியிட்ட அறிக்கை:
 சிந்து சமவெளி நாகரிகத்தின் ஒரு பகுதியான ஹரப்பாவின் தொன்மை தகர்க்கப்பட்டு, வீடுகள் கட்டவும், விவசாய நில விரிவாக்கத்துக்கும் பயன்படுத்தப்படுவதாக பத்திரிகையில் செய்தி வந்துள்ளது.
 உத்தரப்பிரதேச மாநிலம், பக்பட் மாவட்டத்தில் உள்ள 5 ஆயிரம் ஆண்டுகள் பழைமை வாய்ந்த சிந்து சமவெளியில் மக்கள் வாழ்ந்த பகுதி தற்போது முறையாகப் பாதுகாக்கப்படாமல் அழிவின் விளிம்பில் உள்ளது.
 1957-ஆம் ஆண்டு அகழ்வாராய்ச்சியில் வெளிச்சத்துக்கு வந்த இந்த இடம், இந்தியாவிலேயே சரித்திர ரீதியாக மிகவும் முக்கியத்துவம் வாய்ந்த இடம் எனக் கருதப்படுகிறது.
 கங்கைக்கும் யமுனைக்கும் இடையிலான இந்த இடத்தில் தொன்மைக் காலத்தில் மக்கள் வாழ்ந்ததற்கான அடையாளங்கள் தென்பட்டன.
 ஆனால், தற்போது கிராம விவசாயிகள் தங்களுடைய விவசாயத்தை விரிவுபடுத்துவதற்காக பல நூற்றாண்டுகள் பழைமையும் பெருமையும் வாய்ந்த கட்டட அமைப்புகளைத் தகர்த்து வருகின்றனர்.
 சிலர் அந்தப் பகுதியில் தங்கள் வீடுகளையும், தங்கள் சமூகத்திற்கான நினைவிடங்களையும் கோயில் போன்ற அமைப்புகளையும் உருவாக்கி வருகின்றனர்.
 ஹரப்பா கலாசாரத்தின் மையமான இந்தப் பகுதி கண்டுபிடிக்கப்பட்டதற்குப் பிறகு பாதுகாக்கப்பட்டு பராமரிக்கப்பட்டு வந்தது.
 ஆனால், தற்போது அந்த நிலை முற்றிலும் மாறி, சிறிது சிறிதாக அழிந்து வருகிறது.
 மிகத் தொன்மை மக்கள் வாழ்ந்த இந்தப் பகுதி ஹரப்பா கலாசாரத்தின் இறுதிக் கட்டத்தைச் சுட்டிக் காட்டுவதாகும்.
 எனவே, சிந்துவெளி நாகரிகத்தின் அடையாளச் சின்னங்களையும் நாகரிகப் பரப்பையும் காப்பாற்றிட பிரதமர் நரேந்திர மோடியும், உத்தரப்பிரதேச முதல்வர் அகிலேஷ் யாதவும் சரித்திரச் சிந்தனையோடு நடவடிக்கை எடுக்க வேண்டும் என்று அவர் கூறியுள்ளார்.