தமிழகத்தில் இதுவரை 366 உலர் களங்கள்

நெல், தானியங்கள் உள்ளிட்டவற்றை உலர வைப்பதற்காக, தமிழகத்தில் இதுவரை 366 உலர் களங்கள் அமைக்கப்பட்டுள்ளதாக வீட்டு வசதி-வேளாண்மைத் துறை அமைச்சர் ஆர்.வைத்திலிங்கம் தெரிவித்தார்.
 சட்டப் பேரவையில் திங்கள்கிழமை நடைபெற்ற கேள்வி நேரத்தின் போது, புதுக்கோட்டை உறுப்பினர் கார்த்திக் தொண்டைமான், தனது தொகுதியில் கீழமஞ்சக்கரை, வடக்குப்பட்டி ஆகிய இடங்களில் உலர் களங்கள் அமைக்கப்படுமா என்று கேள்வி எழுப்பினார். அதற்கு, அமைச்சர் வைத்திலிங்கம் அளித்த பதில்:
 தமிழகத்தில் விவசாயிகள் பயன்பெறும் வகையில், நெல், தானியங்கள் உள்ளிட்டவற்றை உலர வைப்பதற்காக இதுவரை 366 களங்கள் அமைக்கப்பட்டுள்ளன. விவசாயிகளுக்கு எந்தெந்த இடங்களில் தேவைப்படுகிறதோ அங்கெல்லாம் உலர் களங்கள் நிச்சயம் அமைக்கப்படும் என்றார் அமைச்சர் வைத்திலிங்கம்.