தமிழகத்தில் இதுவரை 138 கோயில் தேர்கள் சீரமைப்பு: அமைச்சர் காமராஜ் தகவல்

தமிழகத்தில் இதுவரை 138 திருக்கோயில்களின் தேர்கள் சீரமைக்கப்பட்டு பயன்பாட்டுக்கு கொண்டு வரப்பட்டுள்ளதாக அமைச்சர் ஆர்.காமராஜ் தெரிவித்தார்.
 சட்டப்பேரவையில் திங்கள்கிழமை கேள்வி நேரத்தின் போது, சங்கரன்கோவில் தொகுதி சட்டப்பேரவை உறுப்பினர் எஸ்.முத்துசெல்வி, தனது தொகுதியில் உள்ள சங்கரநாராயண சாமி கோயிலின் சிலைகள், தூண்கள், ஓவியங்கள் புதுப்பிக்கப்படுமா என்று கேள்வி எழுப்பினார். இதற்கு, உணவு-அறநிலையங்கள் துறை அமைச்சர் ஆர்.காமராஜ் அளித்த பதில்:
 சங்கரநாராயணசாமி கோயிலின் சிலைகள், தூண்கள், ஓவியங்களை பழைமை மாறாமல் புதுப்பிக்க தொல்லியியல் துறை வல்லுநர்கள் மூலமாக அறிக்கை பெறப்பட்டுள்ளது. இப்போது, அனைத்தும் மரப்பலகை மூலம் பாதுகாக்கப்பட்டுள்ளன. புதுப்பிப்பதற்கான உரிய மதிப்பீடுகள் பெற்ற பிறகு தொடங்கப்படும்.
 கோயிலில் உள்ள பிள்ளையார் ரதத்தைச் சீரமைக்கவும் கோரிக்கை விடுக்கப்பட்டுள்ளது. இந்த ரதம் ரூ.9 லட்சத்தில் சீரமைத்து புதிய தேர் பயன்பாட்டுக்கு கொண்டு வரப்படும். தமிழகத்தில் இதுவரை 138 கோயில்களின் திருத்தேர்கள் சீரமைக்கப்பட்டு பயன்பாட்டுக்கு வந்துள்ளதாக அமைச்சர் காமராஜ் தெரிவித்தார்.